అభినేత్రి కోసం విజయవాడ వస్తోందట

మిల్కీ బ్యూటీ తమన్నా చాలా కాలంగా తనకు పేరు తెచ్చిపెట్టే హిట్ కోసం ఎదురుచూస్తోంది. తమ్మూ కెరీర్ లో సక్సెస్ లు ఉన్నా వాటిలో ఈ అమ్మడికి విపరీతంగా పేరు తెచ్చేసిన బాపతు పెద్దగా కనిపించవు. కానీ తొలిసారిగా తనే లీడ్ రోల్ లో చేస్తున్న అభినేత్రి మూవీపై తమన్నాకి ఆశలు ఎక్కువగానే ఉన్నాయి. ప్రభుదేవా లాంటి సీనియర్ ఉన్నా.. మిల్కీనే ఫోకస్ చేస్తూ తిరిగే స్టోరీ కావడంతోనే.. అభినేత్రిపై తమన్నా హోప్స్ పెంచుకుంది.

ప్రస్తుతం అభినేత్రి షూటింగ్ చివరి దశకు చేరుకోగా.. ప్రమోషన్ కార్యక్రమాలను కూడా ప్రారంభించేస్తున్నారు. ఆడియో లాంఛింగ్ తోనే ఈ చిత్రానికి ఫుల్ హైప్ తీసుకురావాలన్నది నిర్మాత కోన వెంకట్ ఆలోచన. అందుకే ఆగస్ట్ 15న విజయవాడలో తలపెట్టిన ఆడియో రిలీజ్ ఫంక్షన్ కి.. అలనాటి అందాల తార శ్రీదేవిని చీఫ్ గెస్టుగా పిలిచారు. ఈ కార్యక్రమానికి హాజరయ్యేందుకు శ్రీదేవి నుంచి గ్రీన్ సిగ్నల్ వచ్చిందని.. ఆమె చేతుల మీదుగానే అభినేత్రి ఆడియో విడుదల కానుందని తెలుస్తోంది.

తెలుగు - తమిళ్ - హిందీ భాషల్లో విడుదల కానున్న లేడీ ఓరియెంటెడ్ మూవీ అభినేత్రికి.. అన్ని భాషల్లోనూ హైప్ తీసుకురావాలంటే., శ్రీదేవితో లాంఛ్ చేయించడమే కరెక్ట్ అని నిర్ణయించాడట కోన వెంకట్. కోన స్పెషల్ రిక్వెస్ట్ కారణంగానే.. శ్రీదేవి ఒప్పుకుందని తెలుస్తోంది. ఓ స్టార్ హీరోయిన్ నటిస్తున్న లేడీ ఓరియెంటెడ్ మూవీని.. సీనియర్ స్టార్ హీరోయిన్ చేతుల మీదుగా లాంఛ్ చేయించడం అంటే.. కొత్తగా థింక్ చేయడమే!