శ్రీకాంత్ మ‌ళ్లీ ప‌ట్టేశాడు!

మొన్న‌టిదాకా సీనియ‌ర్ హీరోల‌తో చేతులు క‌లిపిన శ్రీకాంత్ ఇప్పుడు యంగ్ హీరోల‌పై దృష్టిపెట్టాడు. చిరంజీవి, బాల‌కృష్ణ‌, వెంక‌టేష్‌, నాగార్జున... ఇలా సీనియ‌ర్ హీరోలంద‌రితోనూ క‌లిసి న‌టించిన శ్రీకాంత్ ప్రేక్ష‌కుల‌తో అంద‌రివాడు, అజాత శ‌త్రువు అనిపించుకొన్నాడు. ఒక ప‌క్క క‌థానాయ‌కుడిగా న‌టిస్తూనే మ‌రో ప‌క్క సీనియ‌ర్ల‌తో క‌లిసి వాళ్ల సినిమాల్లో న‌టించాడు. దీంతో అగ్ర క‌థానాయ‌కుల స్థాయిలో ఆయ‌నకి గుర్తింపు ల‌భించింది. ఇప్పుడు ట్రెండ్‌ కి త‌గ్గ‌ట్టుగా యువ క‌థానాయ‌కుల సినిమాల్లో అవ‌కాశాలు అందుకొంటున్నాడు. ఆయ‌న నిర్ణ‌యాల్ని ప‌రిశ్ర‌మ వ‌ర్గాలు మెచ్చుకొంటున్నాయి. `గోవిందుడు అంద‌రివాడేలే`లో రామ్‌ చ‌ర‌ణ్‌ కి బాబాయ్‌గా క‌నిపించి మెప్పించాడు శ్రీకాంత్‌. ఇప్పుడు అల్లు అర్జున్ సినిమాలో ఛాన్సు కొట్టేశాడు.

అల్లు అర్జున్ క‌థానాయ‌కుడిగా బోయ‌పాటి శ్రీను ద‌ర్శ‌క‌త్వంలో ఓ చిత్రం తెర‌కెక్కనున్న విష‌యం తెలిసిందే. త్వ‌ర‌లోనే ఈ సినిమా సెట్స్‌ పైకి వెళ్ల‌బోతోంది. ఇందులో శ్రీకాంత్ ఓ ముఖ్య‌పాత్ర పోషించ‌నున్న‌ట్టు స‌మాచారం. అది కూడా అల్లు అర్జున్‌కి అన్న‌య్య‌గాగానీ, లేదంటే బాబాయ్‌ గా కానీ క‌నిపించొచ్చ‌ని ప‌రిశ్ర‌మ వ‌ర్గాలు చెబుతున్నాయి. ఇందులో ప్ర‌తినాయ‌కుడిగా ఇప్ప‌టికే ఆది పినిశెట్టి ఎంపిక‌య్యాడు. ఇప్పుడు శ్రీకాంత్ కూడా తోడ‌వ్వ‌డంతో సినిమాకి తారాబ‌లం పెరిగిన‌ట్ట‌య్యింది. అల్లు అర్జున్ స‌ర‌స‌న హీరోయిన్‌ గా ర‌కుల్ ప్రీత్‌ సింగ్ న‌టిస్తున్న‌ట్టు స‌మాచారం.

శ్రీకాంత్ ఒక‌ప్పుడు సెంటిమెంట్‌, కుటుంబ క‌థా చిత్రాల‌తో అల‌రించేవాడు. కానీ ఇప్పుడు ఆ సినిమాలకి కాలం చెల్లిపోయింది. దీంతో శ్రీకాంత్ క‌థానాయ‌కుడిగా వెన‌క‌బ‌డిపోయాడు. యేడాదికి రెండు మూడు సినిమాలు చేస్తున్న‌ప్ప‌టికీ ఏ సినిమా కూడా స‌రైన ఫ‌లితాన్ని సాధించ‌డం లేదు. అందుకే యువ క‌థానాయ‌కుల సినిమాల్లో అవ‌కాశం రాగానే ఓకే చెప్పేస్తున్నాడు. నిజానికి ఇలాంటి పాత్ర‌లు పోషిస్తే వ‌చ్చే గుర్తింపు, ద‌క్కే రెమ్యున‌రేష‌న్ సోలో సినిమాల‌కంటే అధికంగా ఉంటుంద‌ని ప‌రిశ్ర‌మ వ‌ర్గాలు చెబుతున్నాయి. అందుకే శ్రీకాంత్ మ‌రో మాట లేకుండా వ‌చ్చిన అవ‌కాశాల‌న్నింటికీ ఓకే చెప్పేస్తున్నాడట‌.