ఆగస్టు7 కూడా 'శ్రీమంతుడు'దే!

ముందు నిర్ణయించినట్టుగానే మహేష్‌బాబు సినిమా 'శ్రీమంతుడు' జులై 17న విడుదలకు సిద్ధమవుతోంది. ఎటొచ్చీ 'బాహుబలి' సినిమా విడుదల తేదీ ఖరారు కాకపోవడంతోనే 'శ్రీమంతుడు' గురించి అభిమానులు ఆలోచనలో పడ్డారు. 'బాహుబలి' వచ్చినా రాకపోయినా జులై 17నే సినిమా విడుదల చేద్దామని మహేష్‌ చెబుతున్నాడట. కానీ ఫ్యాన్స్‌, బయ్యర్లు ఆ తేదీ గురించి ఆందోళన పడుతున్నారు. 'బాహుబలి'లాంటి పెద్ద సినిమా విడుదలవుతున్నప్పుడు రెండు మూడు వారాలైనా గ్యాప్‌ లేకపోతే ఇబ్బందేనని అంటున్నారు. దీంతో నిర్మాతలు మరో తేదీని కూడా ఖరారు చేసినట్టు తెలుస్తోంది.

బాహుబలి జులై 10న విడుదల కాకపోతే 'శ్రీమంతుడు' సినిమాని 17న ప్రేక్షకుల ముందుకు తీసుకొచ్చేలా... లేదంటే మాత్రం ఆగస్టు 7న విడుదల చేసేలా... నిర్మాతలు ప్లాన్‌ చేసుకొన్నారట. శ్రీమంతుడు రెండు తేదీలు ఖరారు చేసుకోవడంతో మిగతా నిర్మాతలంతా ఆందోళన చెందుతున్నారు. పెద్ద సినిమాలన్నీ ఇలా రెండు మూడు తేదీలు ఖరారు చేసుకొంటుండటంతో మా సినిమాల్ని ఎప్పుడు ప్రేక్షకుల ముందుకు తీసుకురావాలో, ఎప్పుడు థియేటర్లు దొరుకుతాయో తెలియని పరిస్థితి ఏర్పడిందని పలువురు చిన్న సినిమాల నిర్మాతలు ఆవేదన వ్యక్తం చేస్తున్నారు.