మహేష్.. అభిమానుల్నీ వదలట్లేదు

‘శ్రీమంతుడు’ సినిమాలో తెర మీదే కాదు.. బయట కూడా కొత్త మహేష్ కనిపిస్తున్నాడు. విడుదలకు ముందు వారం, తర్వాతి వారం ప్రమోషన్స్ లో భాగంగా కాలికి బలపం కట్టుకుని తిరిగాడు మహేష్. తాను రెండు వారాలుగా సరిగా నిద్ర కూడా పోలేదని చెప్పాడతను. అంతగా ప్రమోషన్స్ ఇన్వాల్వ్ అయ్యాడు. నిర్మాతగా కూడా మారడంతో ప్రమోషన్ కున్న వాల్యూ ఏంటో ఈ సినిమాతో బాగానే తెలిసొచ్చింది మహేష్ కు. రిలీజ్ తర్వాత కూడా మీడియాకు ఇంటర్వ్యూలివ్వడం మహేష్ కెరీర్ లో ఇదే తొలిసారి. మీడియా వాళ్లకు కూడా సినిమాను బాగా ప్రమోట్ చేసినందుకు థ్యాంక్స్ చెప్పిన మహేష్.. అభిమానుల్ని కూడా మరిచిపోవట్లేదు. వాళ్లను నేరుగా కలిసి థ్యాంక్స్ చెప్పడానికి సన్నాహాలు చేసుకుంటున్నాడు.

తన గత రెండు సినిమాలతో నిరాశ పరిచినందుకు భేషజం లేకుండా అభిమానులకు క్షమాపణ చెప్పిన మహేష్.. ఇప్పుడు ‘శ్రీమంతుడు’ సినిమాను హిట్ చేసినందుకు వారికి థ్యాంక్స్ చెప్పబోతున్నాడు. రెండు తెలుగు రాష్ట్రాల్లోనూ అభిమానుల్ని నేరుగా కలుసుకోబోతున్నాడు. ముందుగా హైదరాబాద్ లోని శిల్ప కళావేదికలో థ్యాంక్స్ మీట్ జరుగుతుంది. ఆ తర్వాత ఆంధ్రప్రదేశ్ లోని వైజాగ్, గుంటూరు ప్రాంతాల్లో అభిమానులతో థ్యాంక్స్ మీట్ నిర్వహించబోతున్నాడు. శ్రీమంతుడు హిట్టవడంతో మహేష్ ఆనందం మామూలుగా లేదు. కెరీర్ లోనే అత్యంత సంతృప్తినిచ్చిన సినిమాల్లో ఇదొకటని మహేష్ చెబుతున్నాడు. రెండు ఫ్లాపుల తర్వాత హిట్ అందుకోవడం.. అందులోనూ ఓ ఉదాత్తమైన కథాంశంతో చేసిన సినిమాను ప్రేక్షకులు ఆదరించడం.. తన కెరీర్ లోనే ఈ సినిమా హైయెస్ట్ గ్రాసర్ గా నిలుస్తుండటం మహేష్ అమితానందానికి కారణం. అందుకే అభిమానులతో కలిసి తన ఆనందాన్ని పంచుకోవాలని మహేష్ భావిస్తున్నాడు.