‘రాజా ది గ్రేట్’.. హీరోతో సమానంగా అతను

యువ దర్శకుడు అనిల్ రావిపూడి ఇప్పటిదాకా మూడు సినిమాలు తీశాడు. ఆ మూడింట్లో కామన్ గా కొన్ని అంశాలు కనిపిస్తాయి. ఈ మూడు సినిమాలకూ సంగీత దర్శకుడు సాయి కార్తీకే. ఈ మూడింట్లోనూ రాజు సుందరం కొన్ని పాటలకు నృత్యరీతులు సమకూర్చాడు. అలాగే ఈ మూడు సినిమాల్లోనూ కమెడియన్ శ్రీనివాసరెడ్డి కీలక పాత్రలు చేశాడు. పటాస్.. సుప్రీమ్ సినిమాల్లో అతడి పాత్ర బాగా పండింది. ఇప్పుడు ‘రాజా ది గ్రేట్’లో శ్రీనివాసరెడ్డి పాత్ర మరింత బాగా వచ్చిందని చెప్పాడు దర్శకుడు అనిల్ రావిపూడి. దాదాపు హీరోతో సమానంగా.. ఈ పాత్రకు స్క్రీన్ టైం ఉంటుందని అనిల్ వెల్లడించాడు. అతడి పాత్రకు ఇంత ప్రాధాన్యం ఇవ్వడంలో లాజిక్ ఏంటని రవితేజ అడిగాడని.. అందుకు సినిమాలో జస్టిఫికేషన్ ఇచ్చామని అన్నాడు అనిల్.

ఈ చిత్రంలో రవితేజ పాత్ర కనిపించినపుడల్లా శ్రీనివాసరెడ్డి పూలు జల్లుతూ పూజలు చేస్తాడని.. ఇదేంటని అడిగితే ఒక కథ చెబుతాడని అనిల్ వివరించాడు. ఆర్టీసీ క్రాస్ రోడ్స్ లోని ఓడియన్ థియేటర్ దగ్గర చీమిడి ముక్కుతో.. చింపిరి జుట్టుతో ఉన్న మూడేళ్ల పిల్లోడిని హీరో దగ్గరికి తీసుకుని పెంచుకుంటాడని.. ఆ పాత్రే శ్రీనివాసరెడ్డిదని.. అలా చేశాడు కాబట్టి హీరోను ఆ పాత్ర దేవుడిలా చూస్తుందని అనిల్ చెప్పాడు. రవితేజ లాజిక్ అడిగాకే ఈ బ్యాక్ స్టోరీ పెట్టినట్లు అనిల్ వెల్లడించాడు. ఈ సినిమా అంతటా రవితేజ షో కనిపిస్తుందని.. తనతో పాటు శ్రీనివాసరెడ్డికి కూడా మంచి పేరు వస్తుందని అనిల్ ధీమా వ్యక్తం చేశాడు. ‘రాజా ది గ్రేట్’ ఈ బుధవారమే ప్రేక్షకుల ముందుకు రానున్న సంగతి తెలిసిందే.