ట్రైలర్లో ట్విస్టే లేదు కద సారూ..

ఆగస్టు సినిమాల ధమాకా రేపటి నుంచే మొదలు కానుంది. ఈ వారం ‘గూఢచారి’.. ‘చి ల సౌ’.. ‘బ్రాండ్ బాబు’ రిలీజ్ కాబోతున్నాయి. వచ్చే వారానికి మరింత ఆసక్తికర సినిమాలు సిద్ధంగా ఉన్నాయి. అందులో ఒకటి ‘శ్రీనివాస కళ్యాణం’. ఇప్పటికే టీజర్.. ఆడియోలతో ఆకట్టుకున్న ఈ చిత్రం ఇప్పుడు ట్రైలర్‌ తో పలకరించింది. సూపర్ స్టార్ మహేష్ బాబు చేతుల మీదుగా ఈ రోజే ‘శ్రీనివాస కళ్యాణం’ ట్రైలర్ లాంచ్ అయింది. ఈ ట్రైలర్ అంతటా కలర్ ఫుల్ విజువల్స్.. వీనుల విందులైన సంగీతం.. చక్కటి మాటలు అలరించాయి. ట్రైలర్ అంతటా ఒక పాజిటివిటీ కనిపిస్తోంది. హీరో హీరోయిన్లు నితిన్.. రాశి ఖన్నా చాలా అందంగా కనిపించారు. భారీ తారాగణంతో తెరంతా చాలా నిండుగా కనిపించింది. లొకేషన్లు.. సెట్టింగ్స్ అన్నీ కూడా చాలా అందంగా ఉన్నాయి.

ఐతే అంతా ఓకే కానీ.. ట్రైలర్ అంతటా చాలా ఫ్లాట్‌గా సాగిపోవడమే ఆశ్చర్యం కలిగించే విషయం. ఇందులో ఎక్కడా ఒక మలుపు కూడా కనిపించలేదు. హీరో హీరోయిన్లు కలుసుకోవడం.. తర్వాత ప్రేమలో పడటం.. ఆపై పెద్దల దగ్గరికి వ్యవహారం వెళ్లడం.. పెళ్లికి ఏర్పాట్లు చేయడం.. చాలా గ్రాండ్‌ గా పెళ్లి జరిపించడం.. ఇలా ఎక్కడా ఏ కష్టం లేకుండా.. మలుపు లేకుండా సినిమా సాగిపోయేలా ఉంది. పెళ్లి గొప్పదనాన్ని చూపించే ప్రయత్నం చేసిన సంగతి స్పష్టంగా కనిపిస్తోంది. ఐతే ఇలా ఏ మలుపూ ఫ్లాట్‌ గా సినిమా సాగిపోతే ప్రేక్షకులకు ఎలాంటి ఫీలింగ్ వస్తుందన్నది సందేహం. ట్రైలర్ వరకు ఇలా ఏ ట్విస్టూ లేకుండా చూపించారా.. నిజంగానే సినిమా కూడా ఇలాగే సాగిపోతుందా అన్నది తెలియాల్సి ఉంది. సినిమాలో మలుపులు లేకుంటే మాత్రం జనాలకు ఇది ఏమాత్రం రుచిస్తుందన్నది డౌటే.