వైట్ల కోనను వదిలేశాడు కానీ..

శ్రీను వైట్ల-కోన వెంకట్-గోపీమోహన్.. టాలీవుడ్లో సూపర్ సక్సెస్ డైరెక్టర్-రైటర్స్ కాంబినేషన్ ఇది. వీళ్ల కాంబినేషన్లో ‘ఢీ’ దగ్గర్నుంచి ‘దూకుడు’ వరకు ఎన్నో సూపర్ హిట్లు వచ్చాయి. ఐతే ‘బాద్ షా’ సినిమా సమయంలో వైట్లకు.. కోనకు మధ్య తలెత్తిన విభేదాలతో వీళ్ల సక్సెస్ కోటకు బీటలు వారాయి. విభేదాలకు తాత్కాలికంగా తెరదించి ‘బ్రూస్ లీ’తో మళ్లీ ఈ ముగ్గురూ కలిసినా ఫలితం లేకపోయింది. ఆ సినిమా డిజాస్టర్ కావడంతో మళ్లీ వైట్లకు.. కోనకు విభేదాలు తీవ్రమయ్యాయి. దీంతో మళ్లీ ఇద్దరూ కలిసి పని చేయడం అసాధ్యమని తేలిపోయింది. ఐతే కోన దూరమైనప్పటికీ.. అతడికి అత్యంత ఆప్తుడైన కో రైటర్ గోపీ మోహన్ ను మాత్రం కోన దూరం చేసుకోకపోవడం విశేషం.

కోన కొత్త సినిమా ‘మిస్టర్’కు కథ అందించింది గోపీ మోహనే కావడం విశేషం. తన కెరీర్ కు చాలా కీలకమైన ఈ సినిమాకు వైట్ల.. గోపీ నుంచే కథ తీసుకోవడం ఆసక్తి రేకెత్తించే విషయమే. కోన లేకుండా గోపీ ఒక్కడితోనే తొలిసారి పని చేస్తున్న వైట్ల.. అతడి నుంచి ఎలాంటి ఔట్ పుట్ రాబట్టుకున్నాడో చూడాలి. ఈ చిత్రం వీళ్లిద్దరి కాంబినేషన్లో వచ్చిన గత సినిమాలకు భిన్నంగా ఉంటుందని.. దీని టీజర్ చూస్తేనే అర్థమైంది. ఈ సినిమా ఆడితే మున్ముందు వైట్ల-గోపీ కాంబినేషన్ కొనసాగే అవకాశముంది. ఈ చిత్రానికి మరో రచయిత కూడా పని చేశాడు. అతనే శ్రీధర్ సీపాన. అతను డైలాగ్స్ రాశాడు. స్క్రీన్ ప్లే క్రెడిట్ వైట్లనే తీసుకున్నాడు. మరి ఈ కాంబినేషన్ ఏమాత్రం వర్కవుటవుతుందో ఏప్రిల్ 14న తేలుతుంది.

Like Us on Facebook : https://www.facebook.com/Tupakidotcom/