'దేవదాస్‌' ట్రైలర్‌.. ఇప్పుడేమంటావ్‌ శ్రీరామ్‌?

నాగార్జున, నాని కలిసి నటించిన మల్టీస్టారర్‌ మూవీ ‘దేవదాస్‌’ విడుదలకు సిద్దం అవుతుంది. ఈ చిత్రం ప్రారంభం అయినప్పటి నుండి కూడా హిందీ ‘జానీ గబ్బర్‌’ అనే చిత్రానికి రీమేక్‌ అంటూ వార్తలు వచ్చాయి. ఆ తర్వాత హాలీవుడ్‌ మూవీ ‘అనాలసిస్‌ దిస్‌’ అనే చిత్రాన్ని ఇన్సిపిరేషన్‌గా తీసుకుని దర్శకుడు శ్రీరామ్‌ ఆధిత్య ఈ చిత్రాన్ని తెరకెక్కిస్తున్నాడు అంటూ వార్తలు వచ్చిన విషయం తెల్సిందే. మీడియాలో వస్తున్న వార్తలపై కొన్ని నెలల క్రితం దర్శకుడు శ్రీరామ్‌ ఆధిత్య స్పందిస్తూ ఈ చిత్రం రీమేక్‌ కానే కాదని - ఇది ఒక ఒరిజినల్‌ స్క్రిప్ట్‌ తో తెరకెక్కిస్తున్నట్లుగా చెప్పుకొచ్చాడు. అయితే ట్రైలర్‌ విడుదలైన తర్వాత ఈ చిత్రం పక్కాగా 1999లో వచ్చిన ‘అనాలసిస్‌ దిస్‌’ అనే హాలీవుడ్‌ చిత్రానికి కాపీ అంటూ సోషల్‌ మీడియాలో జనాలు అంటున్నారు.

అనాలసిస్‌ దిస్‌ చిత్రంలోని పాత్రలను దర్శకుడు ఇన్సిపిరేషన్‌ గా తీసుకుని ‘దేవదాస్‌’ చిత్రాన్ని తెరకెక్కించినట్లుగా సోషల్‌ మీడియా వేదికగా చర్చ జరుగుతుంది. అనాలసిస్‌ దిస్‌ చిత్రంలోని రాబర్డ్‌ డెనిరో పోషించిన పాత్ర బాడీలాంగ్వేజ్‌ - దేవదాస్‌ చిత్రంలోని నాగార్జున బాడీలాంగ్వేజ్‌ ల మద్య చాలా పోలిక ఉందని - రెండు పాత్రలు కూడా సేమ్‌ టు సేమ్‌ ఉన్నట్లుగా అనిపిస్తుందంటున్నారు. ఇక నాని పాత్ర అచ్చు బిల్లీ క్రిస్టల్‌ పాత్రను పోలి ఉందనే టాక్‌ కూడా వినిపిస్తుంది. ఇది ఖచ్చితంగా ‘అనాలసిస్‌ దిస్‌’ అనే చిత్రంకు అనధికారిక రీమేక్‌ అంటూ ఆరోపణలు వస్తున్నాయి.

సోషల్‌ మీడియాలో రెండు వీడియోలను పక్క పక్కన పోస్ట్‌ చేసి దీనికి నీ సమాధానం ఏంటీ శ్రీరామ్‌ అంటూ దర్శకుడిని సోషల్‌ మీడియాలో ట్యాగ్‌ చేస్తున్నారు. ‘దేవదాస్‌’ ట్రైలర్‌ కు మంచి రెస్పాన్స్‌ వచ్చింది. సినిమా తప్పకుండా ఆకట్టుకుంటుందనే నమ్మకంతో నాని మరియు నాగార్జున అభిమానులు ఎదురు చూస్తున్నారు. ఇలాంటి సమయంలో సోషల్‌ మీడియాలో కాపీ వ్యవహారం రచ్చ జరుగుతున్న నేపథ్యంలో అంతా కూడా ఆందోళన వ్యక్తం చేస్తున్నారు. ఈ విషయమై దర్శకుడు శ్రీరామ్‌ ఆధిత్య ఎలా స్పందిస్తాడో అంటూ ఆసక్తిగా ఎదురు చూస్తున్నారు.