ఫ్లాప్స్ పడినా బాలీవుడ్ జక్కన్న సినిమా ఛాన్స్ కొట్టేసిన శ్రీవల్లి

సౌత్‌ లో స్టార్‌ హీరోయిన్‌ గా వరుసగా భారీ చిత్రాల్లో నటిస్తూ దూసుకు పోతున్న ముద్దుగుమ్మ రష్మిక మందన్నా బాలీవుడ్‌ పై ఎక్కువ ఫోకస్ పెట్టింది. ఈ అమ్మడు అక్కడ ఇప్పటికే రెండు సినిమాల్లో నటించి ప్రేక్షకుల ముందుకు వచ్చింది. ఆ సినిమాలు బాక్సాఫీస్ వద్ద ఆశించిన స్థాయిలో ఆకట్టుకోలేకపోయాయి.

హిందీ ప్రేక్షకులు రష్మిక మందన్నా కు ఇప్పటివరకు ఫిదా అవ్వలేదు. ముందు ముందు అయినా ఆమెకు పాజిటివ్ రెస్పాన్స్ వస్తుందా అంటే అనుమానమే అన్నట్లుగా కొందరు కామెంట్స్ చేస్తున్నారు. ఈ సమయంలో యానిమల్‌ సినిమాలో రణబీర్ కపూర్ కు జోడీగా నటిస్తున్న రష్మిక మందన్నా మరో భారీ చిత్రంలో ఛాన్స్ దక్కించుకున్నట్లుగా వార్తలు వస్తున్నాయి.

బాలీవుడ్‌ లో మన జక్కన్న రాజమౌళి స్థాయి దర్శకుడు అంటే టక్కున గుర్తుకు వచ్చే దర్శకుడు సంజయ్ లీలా భన్సాలీ. ఈయన దర్శకత్వంలో రూపొందబోతున్న ఒక భారీ చిత్రంలో రష్మిక మందన్నా ఒక హీరోయిన్ గా ఎంపిక అయ్యిందనే వార్తలు బాలీవుడ్‌ సర్కిల్స్ లో జోరుగా ప్రచారం సాగుతున్నాయి.

ఇటీవల రష్మిక ముంబైలోని సంజయ్ లీలా భన్సాలీ ఆఫీస్‌ నుండి బయటకు వెళ్తూ మీడియా కంట పడింది. ఆ సమయంలో రష్మిక కాని సంజయ్ లీలా భన్సాలీ ఆఫీస్‌ కు చెందిన వారు కానీ ఏ ఒక్కరు స్పందించేందుకు ఆసక్తి చూపించలేదు. కానీ బాలీవుడ్ మీడియా జనాలు మాత్రం సంజయ్ లీలా భన్సాలీ సినిమాలో రష్మిక ఎంపిక అయ్యిందని బలంగా వాదిస్తున్నారు.

ఆ విషయమై క్లారిటీ రావడానికి కొంత సమయం పట్టే అవకాశం ఉంది. ఇక ఈ అమ్మడు తెలుగు లో అల్లు అర్జున్‌ తో పుష్ప 2 సినిమా లో నటిస్తోంది. మరో ఒకటి రెండు సినిమాలు చర్చల దశలో ఉన్నాయి. అంతే కాకుండా వారసుడు సినిమాతో రాబోతున్న రష్మిక తమిళనాట కూడా వరుసగా సినిమాలు చేస్తున్న దాఖలాలు కనిపించడం లేదు.

సౌత్‌ నుండి వస్తున్న ఆఫర్లను లైట్ తీసుకుంటుందని తెలుస్తోంది. బాలీవుడ్‌ పైనే ఈమె దృష్టి ఎక్కువగా పెట్టినట్లుగా తాజా పరిణామాలు చూస్తూ ఉంటే అర్థం అవుతోంది. మరి ఈ అమ్మడికి అక్కడ కోరుకున్న సక్సెస్ లు దక్కేనా అనేది చూడాలి.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.