'పుష్ప 2' లో శ్రీవల్లి పాత్ర మధ్యలోనే చనిపోతుందా..??

'పుష్ప: ది రూల్' సినిమా కోసం అభిమానులు ఎంతో ఆసక్తిగా ఎదురుచూస్తున్నారనే సంగతి ప్రత్యేకంగా చెప్పాల్సిన పనిలేదు. అల్లు అర్జున్ - రష్మిక మందన్నా హీరోహీరోయిన్లుగా డైరెక్టర్ సుకుమార్ దర్శకత్వంలో తెరకెక్కిన 'పుష్ప: ది రైజ్' చిత్రం బాక్సాఫీస్ వద్ద సంచలన విజయం సాధించింది. దీంతో ఇప్పుడు అందరి దృష్టి పుష్ప పార్ట్-2 పై పడింది.

ఎర్ర చందనం స్మగ్లింగ్ సిండికేట్ డాన్‌ గా ఎదిగిన పుష్పరాజ్.. తన ప్రయాణంలో ఎలాంటి కష్టాలు ఎదుర్కొన్నాడనే విషయాన్ని 'పుష్ప 2' సినిమాలో చూపించబోతున్నాడు. ఇప్పటికే స్టోరీలో కీలక మార్పులపై క్లారిటీ రావడం.. బౌన్డ్ స్క్రిప్ట్ కూడా రెడీ అయిపోయిందని టాక్ వినిపిస్తోంది.

ఈ నేపథ్యంలో 'పుష్ప 2' సినిమాలో ఇద్దరు హీరోయిన్లు ఉండబోతున్నారనే ఓ న్యూస్ సోషల్ మీడియాలో చక్కర్లు కొడుతోంది. పార్ట్-1 లో పుష్పరాజ్ ప్రేయసి శ్రీవల్లిగా రష్మిక కనిపించగా.. రెండో భాగంలో ఆయన భార్యగా కనిపించనుంది. అయితే ఆమె పాత్ర సినిమా మొత్తం ఉండదట.

మూవీ మధ్యలోనే రష్మిక పాత్ర చనిపోయేలా సుకుమార్ కథ రాసుకున్నాడట. అంతేకాదు మరో హీరోయిన్ కు చోటు కల్పించారట. పాన్ ఇండియా స్థాయిలో 'పుష్ప 2' చిత్రంపై ఉన్న క్రేజ్ ను దృష్టిలో పెట్టుకొని ఓ పాపులర్ నటిని సెకండ్ హీరోయిన్ గా ఎంపిక చేయనున్నారట.

అలాగే, పుష్ప పార్ట్-1 లో సమంత ఐటమ్ సాంగ్ హైలెట్‌ గా నిలిచిన నేపథ్యంలో.. రెండో భాగంలో ఓ బాలీవుడ్ బ్యూటీని రంగంలోకి దింపబోతున్నారట. ఫహాద్ ఫాజిల్ - సునీల్ - రావు రమేష్ - అజయ్ పాత్రలు ఇందులోనూ కొనసాగనుండగా.. మరికొన్ని కొత్త పాత్రలు కూడా కనిపించే అవకాశం ఉందని అంటున్నారు.

ప్రస్తుతం ఇండస్ట్రీలో వినిపిస్తున్న టాక్ ప్రకారం జులైలో 'పుష్ప 2' సెట్స్‌ పైకి రాబోతున్నట్లు తెలుస్తోంది. దీనిపై త్వరలోనే మేకర్స్ క్లారిటీ ఇవ్వనున్నారు. వీలైనంత త్వరగా సినిమాని ఫినిష్ చేసి వచ్చే ఏడాది సమ్మర్ కు రిలీజ్ చేయాలని భావిస్తున్నారట.

మైత్రీ మూవీ మేకర్స్ భారీ బడ్జెట్‌ తో 'పుష్ప: ది రూల్' సినిమా రూపొందనుంది. మొదటి భాగాన్ని మించి ఉండేలా పార్ట్ 2 కోసం ప్రణాళికలు సిద్ధం చేస్తున్నారు. రాక్ స్టార్ దేవిశ్రీ ప్రసాద్ ఈ చిత్రానికి సంగీతం సమకూరుస్తున్నారు.