'వకీల్ సాబ్' సర్ప్రైజ్ పై స్పందించిన తమన్..!

పవర్ స్టార్ పవన్ కళ్యాణ్ నటించిన తాజా చిత్రం 'వకీల్ సాబ్'. ఈ సినిమాతో పవన్ సినీఇండస్ట్రీలోకి రీఎంట్రీ ఇవ్వనున్నాడు. అయితే ఇప్పటికే విడుదలకు సిద్ధమైన ఈ సినిమా ఏప్రిల్ 9న ప్రేక్షకుల ముందుకు రాబోతుంది. ఏడాది కాలంగా పవన్ కళ్యాణ్ ఫ్యాన్స్ కళ్లుకాయలు కాచేలా ఎదురు చూస్తున్నారు. ఈ సినిమా నుండి ప్రస్తుతం సాంగ్స్, టీజర్ సోషల్ మీడియాలో హల్చల్ చేస్తున్నాయి. అవి సినిమా పై అంచనాలు పెంచినప్పటికి ఈ సినిమా బాలీవుడ్ పింక్ మూవీకి రీమేక్ అని తెలిసిందే. కానీ పవర్ స్టార్ రంగంలోకి దిగేసరికి మేకర్స్ పింక్ మూవీని ఉన్నది ఉన్నట్లుగా కాపీ కొట్టకుండా.. స్టోరీ లైన్ మాత్రమే తీసుకున్నారట. స్టోరీ బట్టి పవన్ కళ్యాణ్ క్రేజ్ దృష్టిలో పెట్టుకొని స్క్రిప్ట్ రాసుకొచ్చారట.

ఇదిలా ఉండగా.. వకీల్ సాబ్ లో చాలా సర్ప్రైజెస్ ఉన్నాయని కొన్ని వార్తలు వైరల్ అవుతున్నాయి. కానీ ఇటీవల మ్యూజిక్ డైరెక్టర్ తమన్ వకీల్ సాబ్ గురించి మాట్లాడి సినిమా పై ఆసక్తి పెంచేసాడు. ఈ సినిమాకు నాలుగు సాంగ్స్ అందించాడు తమన్. అవన్నీ కూడా ప్రస్తుతం అభిమానుల నోళ్లలో నానుతున్నాయి. అయితే తాజాగా వకీల్ సాబ్ సెకండ్ హాఫ్ లో ఓ బిగ్ సర్ప్రైజ్ ఉందని.. దానిగురించి ఇప్పుడే చెప్పను అంటూ ఇంటరెస్ట్ క్రియేట్ చేసాడు తమన్. కానీ అభిమానులు మాత్రం సెకండ్ హాఫ్ లో ఫోక్ సాంగ్ ఉందేమో.. అదే సర్ప్రైజ్ కావచ్చు అంటూ అభిప్రాయం వ్యక్తం చేస్తున్నారు. ఇప్పటికే తను సినిమా చూసి చాలా హ్యాపీగా ఫీలైనట్లు తమన్ చెప్పుకొచ్చాడు. ఇక ఈ సినిమాను దిల్ రాజు నిర్మించగా.. శృతిహాసన్, అంజలీ, నివేదా థామస్ ప్రముఖ పాత్రలలో నటించారు.