రూమర్స్ కు చెక్ పెట్టిన SSMB28 ప్రొడ్యూసర్..!

సూపర్ స్టార్ మహేష్ బాబు హీరోగా త్రివిక్రమ్ శ్రీనివాస్ దర్శకత్వంలో #SSMB28 సినిమా తెరకెక్కుతున్న విషయం తెలిసిందే. 'అతడు' 'ఖలేజా' వంటి చిత్రాల తర్వాత వీరి కలయికలో రాబోతున్న హ్యాట్రిక్ మూవీపై భారీ అంచనాలు నెలకొన్నాయి. ఇందులో పూజా హెగ్డే హీరోయిన్ గా నటిస్తోంది.

మహేష్ 28వ చిత్రాన్ని ఇటీవలే సెట్స్ మీదకు తీసుకెళ్లారు. హైదరాబాద్ లోని అన్నపూర్ణ స్టూడియోస్ లో ప్రత్యేకంగా వేసిన సెట్ లో జరిగిన ఫస్ట్ షెడ్యూల్ లో మహేష్ బాబు పాల్గొన్నారు. ప్రముఖ స్టంట్ కొరియోగ్రాఫర్స్ అన్బరివ్ పర్యవేక్షణలో యాక్షన్ ఘట్టాలు తెరకెక్కించబడ్డాయి.

అయితే 'కేజీఎఫ్' ఫైట్ మాస్టర్స్ డిజైన్ చేసిన యాక్షన్ సన్నివేశాలపై మహేష్ అసంతృప్తి వ్యక్తం చేశారని.. స్టంట్ మాస్టర్స్ ని మార్చాలని కూడా యోచన చేస్తున్నారని సోషల్ మీడియాలో కొందరు రూమర్స్ ప్రచారం చేశారు. ఈ నేపథ్యంలో నిర్మాత నాగవంశీ తాజాగా ట్విట్టర్ వేదికగా వాటికి చెక్ పెట్టారు.

నాగవంశీ ట్వీట్ చేస్తూ "కొన్ని కిక్కాస్ హై ఆక్టేన్ ఎపిక్ యాక్షన్ సీన్స్ చిత్రీకరణతో #SSMB28 మొదటి షెడ్యూల్ పూర్తయింది. అమేజింగ్ స్టంట్ కొరియోగ్రఫీకి అన్బరివ్ మాస్టర్స్‌ కి ధన్యవాదాలు. దసరా తర్వాత ప్రారంభం కానున్న రెండవ షెడ్యూల్ లో మన సూపర్ స్టార్ మహేష్ గారు & బుట్ట బొమ్మ పూజా హెగ్డే పాల్గొంటారు. త్వరలో మరిన్ని అప్డేట్స్ వస్తాయి" అని పేర్కొన్నారు.

కాగా, SSMB28 చిత్రాన్ని హారిక అండ్ హాసిని క్రియేషన్స్ బ్యానర్ పై కె రాధాకృష్ణ (చిన్నబాబు) భారీ బడ్జెట్ తో ప్రతిష్టాత్మకంగా నిర్మిస్తున్నారు. మోస్ట్ వాంటెడ్ మ్యూజిక్ కంపోజర్ ఎస్ థమన్ సంగీతం సమకూరుస్తున్నారు. ఇప్పటికే అనౌన్స్ మెంట్ వీడియో మరియు షూటింగ్ గ్లిమ్స్ కు అందించిన బీజీఎంకు మంచి రెస్పాన్స్ వచ్చింది.

పీఎస్ వినోద్ ఈ చిత్రానికి సినిమాటోగ్రఫీ అందిస్తున్నారు. ఏఎస్ ప్రకాష్ ప్రొడక్షన్ డిజైనింగ్ చేస్తుండగా.. నేషనల్ అవార్డ్ విన్నర్ నవీన్ నూలి ఎడిటింగ్ బాధ్యతలు నిర్వహిస్తున్నారు. ఇందులో నటించే మిగతా నటీనటుల వివరాలు త్వరలో వెల్లడి కానున్నాయి.

మహేష్ బాబు - త్రివిక్రమ్ శ్రీనివాస్ కాంబినేషన్ లో దాదాపు 12 ఏళ్ల తర్వాత రాబోతున్న ఈ ప్రాజెక్ట్ పై అందరిలో ప్రత్యేకమైన ఆసక్తి నెలకొంది. ఈ రెండు సినిమాలు మహేశ్ లోని సరికొత్త కోణాన్ని ఆవిష్కరించడంతో.. ఈసారి ఎలా ప్రెజెంట్ చేస్తారని ఎగ్జైటింగ్ వేచి చూస్తున్నారు.

దీనికి తగ్గట్టుగానే ఇందులో మహేశ్ ను మాస్ అవతార్ లో చూపించబోతున్నట్లు మేకర్స్ ఇప్పటికే హింట్ ఇచ్చారు. అందులోనూ ఇది హై ఆక్టేన్ ఎపిక్ ఎంటర్ టైనర్ అని పేర్కొనడంతో.. అంచనాలు బాగా పెరిగిపోయాయి. ఈసారి వినోదంతో పాటుగా ఇంటెన్స్ యాక్షన్ ని చూడబోతున్నామని అందరూ ఫిక్స్ అయ్యారు. మరి ఈ సినిమా బాక్సాఫీస్ వద్ద ఎలాంటి సంచనాలు సృష్టిస్తుందో చూడాలి.

SSMB28 చిత్రాన్ని 2023 ఏప్రిల్ 28న ప్రపంచ వ్యాప్తంగా భారీ స్థాయిలో విడుదల చేయనున్నట్లు మేకర్స్ ప్రకటించారు.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.