కరోనా బారినపడ్డ క్రియేటివ్ డైరెక్టర్.. ఆగిన పవర్ స్టార్ సినిమా!!

కరోనా వైరస్ రోజురోజుకి టాలీవుడ్ ఇండస్ట్రీలో విలయతాండవం చేస్తోంది. మహమ్మారి కారణంగా ఎవరు ఎన్ని జాగ్రత్తలు తీసుకున్నా.. ఎంత సామాజిక దూరం పాటించినా కరోనా బారిన పడేవారి సంఖ్య మాత్రం పెరుగుతూనే ఉంది. ఇటీవలే లాక్ డౌన్ సడలించి రెండు తెలుగు రాష్ట్రాలలో నిబంధనలతో కూడిన అనుమతులు జారీచేసాయి ప్రభుత్వాలు. లాక్‌డౌన్ సడలింపుల తరువాత ఇండస్ట్రీలో కొన్ని సినిమాల షూటింగ్స్ ప్రారంభం అయ్యాయి. కొందరు మేం జాగ్రత్తలు తీసుకుంటున్నాం అనే ధీమాతో షూటింగ్స్ ప్రారంభిస్తే.. మరికొందరు కరోనా భయంతో ముందే షూటింగ్స్ నిలిపేశారు. ఇప్పుడు ఇండస్ట్రీలోని హీరో హీరోయిన్లతో పాటు డైరెక్టర్ల పైన కరోనా టార్గెట్ చేసినట్లు అనిపిస్తుంది. ఎందుకంటే ఇటీవలే.. మెగా పవర్ స్టార్ రాంచరణ్, వరుణ్ తేజ్ కరోనా బారిన పడగా.. ఆ తర్వాత హీరోయిన్ రకుల్ ప్రీత్ సింగ్ కరోనా బారిన పడింది.

ఇక తాజాగా క్రియేటివ్ డైరెక్టర్ క్రిష్ జాగర్లమూడి కరోనా బారిన పడినట్లు ప్రకటించాడు. ప్రస్తుతం క్రిష్ హోమ్ క్వారంటైన్ లో ఉన్నట్లు తెలుస్తుంది. తాజాగా కరోనా టెస్ట్ చేయించుకొని నెగటివ్ వస్తే.. పవర్ స్టార్ పవన్ కళ్యాణ్ తో సినిమా షూటింగ్ స్టార్ట్ చేద్దామని ప్లాన్ వేసాడు. డేట్ కూడా జనవరి 4న అని ప్రకటించాడు. కానీ ఇంతలో కరోనా పాజిటివ్ రావడంతో పవన్ కళ్యాణ్ తో షూటింగ్ వాయిదా పడింది. ఇప్పటికే వైష్ణవ్ తేజ్, రకుల్ ప్రీత్ సింగ్ లతో గ్రామీణ నేపథ్య సినిమా షూటింగ్ ఫినిష్ చేసాడు. ఇక ఈ సినిమాకు కొండపొలం అనే పేరును పరిశీలిస్తున్నారు. ఈ సినిమా త్వరలోనే డిజిటల్ విడుదల కానుంది. అలాగే డైరెక్టర్ కూడా క్వారంటైన్ లో కోలుకునే స్టేజిలో ఉన్నట్లు తెలుస్తుంది. చూడాలి మరి పవన్ క్రిష్ ల సినిమా షూటింగ్ ఎప్పుడు షురూ అవుతుందో..!!