జాతకాలనే నమ్ముకుంటున్న స్టార్ డైరెక్టర్..!

సినీ ఇండస్ట్రీలో సెంటిమెంట్స్ - న్యూమరాలజీ - జ్యోతిష్యాలు - జాతకాలు వంటి వాటికి అధిక ప్రాధాన్యత ఇస్తారనే సంగతి తెలిసిందే. కొబ్బరికాయ కొట్టి ఒక సినిమా షూటింగ్ ప్రారంభించే దగ్గర నుంచి.. చిత్రీకరణ పూర్తి చేసుకొని గుమ్మడికాయ కొట్టే వరకు ప్రతీ విషయంలో ముహుర్తాలు చూసుకుంటుంటారు. అయితే ఇప్పుడు టాలీవుడ్ లో ఒక డైరెక్టర్ జాతకాలు - వాస్తుశాస్త్రం అంటూ నిర్మాతను ఇబ్బంది పెడుతున్నాడనే వార్త చర్చనీయాంశంగా మారింది.

ఇటీవల బ్లాక్ బస్టర్ విజయాన్ని అందుకున్న ఓ దర్శకుడు ప్రస్తుతం టాలీవుడ్ యంగ్ హీరోతో సినిమా చేయడానికి రెడీ అవుతున్నారు. ఇప్పటికే దీనికి సంబంధించిన అధికారిక ప్రకటన కూడా వచ్చింది. గత సినిమా సక్సెస్ ని దృష్టిలో పెట్టుకొని భారీ స్థాయిలో ఈ చిత్రాన్ని ప్లాన్ చేస్తున్నారు. అయితే చాలా కాలంగా హిట్ కోసం ట్రై చేసిన ఆ డైరెక్టర్.. ఇప్పుడు సక్సెస్ వచ్చిన తర్వాత సెంటిమెంట్ల మీద నమ్మకం పెంచుకున్నారట.

జాతకాలు - వాస్తులను బలంగా నమ్ముతున్న సదరు దర్శకుడు బిహేవియర్ ఇప్పుడు నిర్మాతకు తలనొప్పిగా మారిందట. పెద్ద సినిమా చేసే అవకాశం రావడంతో ఎగ్జైటింగ్ గా ఉన్న ప్రొడ్యూసర్.. కథా చర్చల కోసం ఒక ఆఫీస్ ని ఏర్పాటు చేయాలని భావించారు. అయితే వాస్తు పేరుతో ఆ దర్శకుడు ఇప్పటివరకు ఏ బిల్డింగ్ నూ ఫైనలైజ్ చేయనీయడం లేదట.

చూసిన ప్రతీ దాన్ని వాస్తు బాగాలేదని డైరెక్టర్ రిజెక్ట్ చేస్తుండటంతో.. ఏం చేయాలా అని ప్రొడ్యూసర్ తల పట్టుకుంటున్నాడట. ఆఫీస్‌ లేకపోవడంతో తాత్కాలిక వసతి మరియు ఇతర ఏర్పాట్లతో నిర్మాతకు అదనపు భారం పడుతోందని తెలుస్తోంది.

దీంతో ఇప్పుడే ఇలా ఉంటే రాబోయే రోజుల్లో సినిమా విషయంలో దర్శకుడు ఎన్ని తలనొప్పులు తెచ్చిపెడతారో అని నిర్మాత భయపడుతున్నాడట. సినిమా ఆఫీస్ విషయంలోనే కాదు.. జాతకాలు - వాస్తు పిచ్చి ఆ దర్శకుడిని పూర్తిగా భిన్నమైన వ్యక్తిని చేశాయని ఫిలిం సర్కిల్స్ లో మాట్లాడుకుంటున్నారు.

ఒకప్పుడు దర్శకుడు మరీ ఇలా ఉండేవాడు కాదని.. చివరి మూవీ సక్సెస్ తర్వాతే ఇలా అయిపోయాడని చెబుతున్నారు. ఆ సినిమాలో నటించిన హీరో ప్రభావం మనోడి మీద పడిందేమో అనే సందేహాలు కూడా వ్యక్తం చేస్తున్నారు.

ఏదైతేనేం సెంటిమెంట్స్ అందరికీ ఉంటాయి. అందులో తప్పులేదు. కానీ దేన్నైనా అతిగా విశ్వసించడం అనేది అనర్థాలు తెచ్చిపెడుతుంది. అందుకే జాతకాలు - వాస్తు అంటూ నిర్మాతలను ఇబ్బంది పెట్టకుండా.. మంచి కథ రెడీ చేసుకొని ప్రేక్షకులను ఆకట్టుకునేలా సినిమాను రూపొందించడంపై దృష్టి పెట్టాలని అభిమానులు సూచిస్తున్నారు.