'రుద్ర' సిరీస్ తో డిజిటల్ వరల్డ్ లోకి స్టార్ హీరో..!

రాబోయే రోజుల్లో వెబ్ కంటెంట్ హవా కొనసాగుతుందని భావించిన స్టార్ హీరోహీరోయిన్లు డిజిటల్ వరల్డ్ లో అడుగులు వేస్తున్నారు. ఈ ట్రెండ్ బాలీవుడ్ నుంచి సౌత్ ఇండస్ట్రీకి కూడా పాకింది. బాలీవుడ్ లో ఎప్పటి నుంచో అనేకమంది స్టార్ యాక్టర్స్ వెబ్ సిరీస్ లలో నటిస్తూ వస్తున్నారు. ఈ క్రమంలో స్టార్ హీరో అజయ్ దేవగన్ కూడా డిజిటల్ వరల్డ్ లో ఎంట్రీ ఇవ్వడానికి రెడీ అయ్యారు. ''రుద్ర'' అనే సిరీస్ తో డిజిటల్ డెబ్యూ ఇస్తున్నట్లు అధికారికంగా ప్రకటించారు. 'ది ఎడ్జ్ ఆఫ్ డార్క్ నెస్' అనేది దీనికి ఉపశీర్షిక. BBC స్టూడియోస్ ఇండియా సహకారంతో అప్లాజ్ ఎంటర్టైన్మెంట్ సంస్థ ఈ సిరీస్ ను నిర్మిస్తున్నారు.

'రుద్ర - ది ఎడ్జ్ ఆఫ్ డార్క్ నెస్' క్రైమ్ డ్రామా సిరీస్ 2021లోనే డిస్నీ+హాట్‌ స్టార్ విఐపిలో విడుదల కానున్నట్లు తాజాగా వెల్లడించారు. తన కెరీర్ లో ఎన్నో సినిమాల్లో పోలీస్ ఆఫీసర్ గా నటించిన అజయ్ దేవ్‌గన్.. ఇప్పుడు తన మొట్టమొదటి డార్క్ క్రైమ్-డ్రామా సిరీస్ 'రుద్ర' లో ఐకానిక్ కాప్ గా కనిపించనున్నాడు. ఇది 'లూథర్' అనే బ్రిటీష్ డ్రామా సిరీస్ ఆధారంగా రూపొందుతోంది. స్పెషల్ క్రైమ్ స్టోరీతో పవర్ ఫుల్ పాత్రలతో రూపొందుతున్న ఈ సిరీస్ ని ముంబైలోని ఐకానిక్ ప్రదేశాల్లో చిత్రీకరించినట్లు తెలుస్తోంది. దీని గురించి అజయ్ దేవగన్ మాట్లాడుతూ.. ''యూనిక్ కథలు చెప్పడానికి గుడ్ టాలెంట్ తో వర్క్ చేయడానికి నేను ప్రయత్నిస్తుంటాను. డిజిటల్ వరల్డ్ నన్ను బాగా ఎగ్జైట్ చేసింది. 'రుద్ర' సిరీస్ కోసం ఆసక్తిగా ఎదురుచూస్తున్నాను. పోలీస్ పాత్రలు నాకు కొత్త కాదు. కానీ ఇందులో మరింత ఇంటెన్స్, కాంప్లెక్స్ డార్క్ గా నా పాత్ర ఉంటుంది'' అని చెప్పుకొచ్చారు.

ఇకపోతే బాలీవుడ్ స్టార్ హీరో అజయ్ దేవగన్ 'ఆర్.ఆర్.ఆర్' సినిమాతో టాలీవుడ్ లో అడుగుపెడుతున్న సంగతి తెలిసిందే. దర్శకధీరుడు రాజమౌళి ప్రతిష్టాత్మకంగా తెరకెక్కిస్తున్న ఈ ఫిక్షనల్ పీరియాడికల్ మూవీలోఎన్టీఆర్ - రామ్ చరణ్ లతో కలిసి అజయ్ కీలక పాత్ర పోషిస్తున్నారు. ఇటీవలే విడుదలైన ఆయన ఫస్ట్ లుక్ విశేష స్పందన తెచ్చుకుంది. దసరా పండగ సందర్భంగా అక్టోబర్ 13న 'ఆర్.ఆర్ ఆర్' విడుదల కానుంది. అలానే అజయ్ దేవగన్ హీరోగా నటించిన 'మైదాన్' మూవీ అక్టోబర్ 15న రిలీజ్ అవుతుంది.