హాట్ టాపిక్: స్టార్ హీరో విగ్గు క‌హానీ

గెట‌ప్పులు ప‌రంగా ప్ర‌యోగాలు చేయ‌డంలో బ‌న్ని త‌ర్వాత‌నే. సౌత్ లోనే ది బెస్ట్ స్టైలిష్ స్టార్ గా వెలిగిపోతున్న బ‌న్ని కెరీర్ తొలి నుంచి గెట‌ప్స్ ప‌రంగా ప్ర‌యోగాలెన్నో చేశాడు. న‌టించిన‌ ఐదో సినిమా దేశ‌ముదురు కోసం లాంగ్ హెయిర్ పెంచి సిక్స్ ప్యాక్ లో ద‌ర్శ‌న‌మిచ్చాడు. ఆ త‌ర్వాతా గెట‌ప్ ప‌రంగా ప్ర‌యోగాలు చేశాడు. ఇటీవ‌లే `స‌రైనోడు` కోసం పిల‌క‌ముడి- పంచెక‌ట్టుతో బ్రాహ్మ‌ణుడిగానూ న‌టించి మెప్పించారు.

ఆ త‌ర్వాతా ప్ర‌యోగాలే. వ‌క్కంతంతో `నా పేరు సూర్య కోసం` ఏకంగా బాడీ లాంగ్వేజ్ నే మార్చేశాడు. ఆర్మీ అధికారి గెట‌ప్ కోసం భారీగా బాడీ బిల్డింగ్ చేసి మిల‌ట‌రీ హెయిర్ క‌ట్ తో అల‌రించాడు. కెరీర్ లో ఇలాంటి ప్ర‌యోగాల‌తోనే అత‌డు స్టైలిష్ స్టార్ గా అవ‌త‌రించాడు. ఇక‌ముందు కూడా బ‌న్ని ఇదే పంథాని అనుస‌రిస్తున్నాడ‌ని తెలుస్తోంది. ఆదిత్య శ్రీ‌రామ్.. సుకుమార్ చిత్రాల్లోనూ అత‌డు కొత్త‌గానే క‌నిపిస్తాడ‌ట‌.

ఇటీవ‌లే ఒకేసారి మూడు సినిమాల‌కు గ్రీన్ సిగ్న‌ల్ ఇచ్చి బ‌న్ని స‌ర్ ప్రైజ్ చేశాడు. మాట‌ల మాంత్రికుడు త్రివిక్ర‌మ్ ద‌ర్శ‌క‌త్వంలో చ‌క్క‌ని ఫ్యామిలీ ఎంట‌ర్ టైన‌ర్ లో న‌టిస్తున్నాడు. అలానే ఆదిత్య శ్రీ‌రామ్ ద‌ర్శ‌క‌త్వంలో `ఐక‌న్` అనే డిఫ‌రెంట్ మూవీని ఎంపిక చేసుకున్నాడు. అంతేకాదు `ఐక‌న్` చిత్రంలో బ‌న్ని ద్విపాత్రాభిన‌యం చేయ‌నున్నాడు. ఇందులో ఒక‌టి యంగ్ & ఫ‌న్నీ ల‌వ్వ‌బుల్ రోల్ కాగా.. ఇంకొక పాత్ర‌లో మ‌ధ్య వ‌య‌స్కుడు (మిడిలేజీ)గా క‌నిపిస్తాడ‌ట‌. మిడిలేజ్ పాత్ర కోసం విగ్గు ధ‌రించ‌నున్నాడ‌ని తెలుస్తోంది. అయితే ఇన్నేళ్ల‌ కెరీర్ లో ఇప్ప‌టివ‌ర‌కూ విగ్గు అవ‌స‌రం ప‌డ‌లేదు. తొలిసారి విగ్గు ధ‌రిస్తున్నాడట‌. ఐక‌న్ చిత్రాన్ని శ్రీ‌వెంక‌టేశ్వ‌ర క్రియేష‌న్స్ ప‌తాకంపై దిల్ రాజు నిర్మిస్తున్నారు. ఈ సినిమా రెగ్యుల‌ర్ చిత్రీక‌ర‌ణ‌కు సంబంధించిన మ‌రిన్ని వివ‌రాలు తెలియాల్సి ఉంది. అలాగే బ‌న్ని కోసం సుకుమార్ పూర్తి స్థాయిలో స్క్రిప్టును తీర్చిదిద్దుతున్న సంగ‌తి తెలిసిందే. ఆ సినిమా ఎప్పుడు సెట్స్ కెళుతుంది? అందులో బ‌న్నీ పాత్ర ఎలా ఉండ‌బోతోంది? అన్న‌ది ఇప్ప‌టికైతే స‌స్పెన్స్. బ‌న్ని ప్ర‌స్తుతం త్రివిక్ర‌మ్ తో సినిమాపైనే పూర్తిగా ఫోక‌స్ పెట్టాడ‌ని తెలుస్తోంది.