మణిరత్నం మూవీలో స్టార్ హీరో వైఫ్!

మణిరత్నం తన సినిమాలకి కథలను రెడీ చేసుకునే తీరు .. తెరపై వాటిని ఆవిష్కరించే విధానం విభిన్నంగా ఉంటాయి. టేకింగ్ విషయంలో ఆయన మార్కును ఎవరూ టచ్ చేయలేకపోయారు. ఆయన ముందు సినిమా ఫ్లాప్ అయినా ఆ తరువాత సినిమా విషయంలో ఆడియన్స్ లో ఎంత మాత్రం ఆసక్తి తగ్గదు. ఆయన సినిమాను తప్పకుండా చూడాలనే ఉత్సాహాన్ని కనబరుస్తుంటారు. ఎక్కువగా సున్నితమైన ప్రేమకథలకు ప్రాధాన్యతనిచ్చే ఆయన, ఈ సారి చారిత్రక నేపథ్యం కలిగిన కథను ఎంచుకోవడం విశేషం.

'పొన్నియిన్ సెల్వన్' అనే చారిత్రక కథను మణిరత్నం సిద్ధం చేసుకున్నారు. ఇది చోళ రాజుల కాలంతో ముడిపడిన కథ. భారీ బడ్జెట్ .. భారీ తారాగణం అవసరం. అయినా లెక్క చేయకుండా మణిరత్నం రంగంలోకి దిగారు. లైకా ప్రొడక్షన్స్ వారు నిర్మిస్తున్న ఈ సినిమాలో ఆయన కూడా భాగస్వామిగా మారారు.

ఇది ఒక భాగంలో చెప్పలేని విస్తారమైన కథావస్తువు. అందువలన మణిరత్నం 'బాహుబలి' తరహాలో ఈ సినిమాను రెండు భాగాలుగా విడుదల చేయనున్నారు. మొదటి భాగాన్ని సెప్టెంబర్ 30వ తేదీన ప్రపంచవ్యాప్తంగా విడుదల చేయనున్నారు.

ఈ సినిమాలో విక్రమ్ .. కార్తి .. జయం రవి .. ప్రభు .. ప్రకాశ్ రాజ్ .. శరత్ కుమార్ .. పార్తీబన్ .. ఐశ్వర్య రాయ్ .. ఐశ్వర్య లక్ష్మి .. శోభిత ధూళిపాళ ప్రధానమైన పాత్రలలో కనిపించనున్నారు. ఈ సినిమాలో అజిత్ భార్య షాలినీ కూడా ఒక అతిథి పాత్రలో కనిపించనుందనే టాక్ కొన్ని రోజులుగా వినిపిస్తోంది.

బాలనటిగా అనేక సినిమాల్లో నటించిన షాలినీ, మణిరత్నం సినిమా 'సఖి'తో కథానాయికగా మరింత గుర్తింపు తెచ్చుకుంది. వివాహమైన తరువాత ఆమె నటనకు దూరంగా ఉంది. అలాంటి షాలినీ .. మళ్లీ ఇప్పుడు ఈ సినిమాలో అతిథి పాత్రలో కనిపించనుందనే ప్రచారం జరుగుతోంది.

అజిత్ సన్నిహితులు మాత్రం ఇదంతా కేవలం పుకారు మాత్రమేననీ, షాలినీ ఈ సినిమాలో చేయడం లేదని చెబుతున్నారు. మరి ఈ విషయంలో ఏది నిజమనే విషయం తేలాలంటే కొంతకాలం వరకూ ఆగవలసిందే.షాలినీ సంగతి అటుంచితే ఈ సినిమాపై భారీ అంచనాలు ఉన్నాయి. సౌంత్ నుంచి రానున్న మరో భారీ సినిమాగా దీనిని గురించి చెప్పుకుంటున్నారు. ఈ సినిమా ఎలాంటి రికార్డులను సృష్టిస్తుందనేది చూడాలి మరి.