ఫిబ్రవరి 5న స్టార్ హీరోయిన్ మూవీ ఓటిటి రిలీజ్!

కరోనా మహమ్మారి వలన లాక్‌డౌన్ లో సినిమా థియేటర్లు మూతపడటంతో జనాలకు ఓటీటీ ఫ్లాట్ ఫాములు మంచి వినోదం అందిస్తూ వచ్చాయి. ఈ క్రమంలో అమెజాన్ ప్రైమ్.. నెట్ ఫ్లిక్స్.. ఆహా.. హాట్ స్టార్ వంటి ఆన్ లైన్ ప్లాట్ ఫాములకు మంచి ఆదరణ పెరుగింది. రోజురోజుకి ఓటీటీలలో విడుదల అవుతున్న తెలుగు సినిమాల జాబితా కూడా అలాగే పెరుగుతుంది. అలాగే మీడియం బడ్జెట్.. హై బడ్జెట్ సినిమాలను ఓటీటీలో రిలీజ్ చేసేందుకు దర్శకనిర్మాతలు వెనుకాడటం లేదు. ఈ లాక్ డౌన్ లో ఒకటి రెండు కాదు చాలా ఓటిటిలు కొత్తగా ప్రారంభం అయ్యాయి. థియేటర్స్ దొరకకపోతే ఈజీగా ఓటిటి బాట పడుతున్నారు మేకర్స్. అయితే కేవలం తమ భాషలోని సినిమాలే కాకుండా కంటెంట్ బాగున్న సినిమాలను వెతికి మరీ తీసుకొస్తున్నాయి ఓటిటిలు. ఇప్పటికే తెలుగు సినిమాలు వేరే భాషలోకి, వేరే భాషలోని సినిమాలు తెలుగులో చాలా డబ్ చేసి రిలీజ్ చేస్తున్నారు.

తాజాగా 'ఫిలిం ఓటిటి' అనే డిజిటల్ ప్లాట్ ఫామ్ స్టార్ హీరోయిన్ త్రిష నటించిన మలయాళం సినిమాను డబ్ చేసి రిలీజ్ చేసేందుకు రెడీ అయింది. ఇండిపెండెంట్ సినిమాలు, వెబ్ సిరీస్ లు, ప్రీమియర్ షోలు, సెలబ్రిటీ ప్రోగ్రాంస్ ఇలా అన్ని స్ట్రీమ్ చేస్తున్నాయి ఓటిటిలు. అయితే 'పిజ్జా2' థ్రిల్లర్ మూవీతో స్ట్రీమింగ్ ప్రారంభించిన ఫిలిం ఓటీటీ తాజాగా రొమాంటిక్ ఎంటర్టైనర్ మలయాళ చిత్రం ”హే జూడ్”ను ప్రేక్షకుల ముందుకు తీసుకొస్తోంది. మలయాళ నటుడు నివిన్ పాలీ హీరోగా నటించిన ఈ సినిమాలో త్రిష హీరోయిన్. తెలుగు డబ్బింగ్ లో కూడా ”హే జూడ్” అనే పేరుతోనే విడుదల చేస్తున్నారు. అయితే ఈ సినిమాను ‘ఫిలిం ఓటీటీ’లో ఫిబ్రవరి 5 నుండి స్ట్రీమ్ చేస్తున్నట్లు ప్రకటించారు. 2018లో విడుదలై సూపర్ హిట్ అందుకున్న ఈ సినిమా రొమాంటిక్ కామెడీ చిత్రంగా విపరీతంగా ఆకట్టుకుంది. శ్యామ్ ప్రసాద్ దర్శకత్వం వహించారు. అయితే ఈ సినిమానే కాకుండా ఆహా లాగా ఫిలిం ఓటిటి వారు చాలా సినిమాలను లైన్ లో పెడుతున్నారు. అందులో మాముట్టి రంగున్ రౌడీ, విస్మయ సినిమాలు త్వరలో విడుదల కానున్నాయట. చూడాలి మరి త్రిష హే జ్యూడ్ ఎలా ఆకట్టుకుంటుందో!