ప్రేక్ష‌కుల్ని స‌ర్‌ప్రైజ్ చేసిన రోజీ

క్రేజీ సినిమా థియేట‌ర్ల‌లోకి వ‌చ్చేసిందంటే ప్రేక్ష‌కులు చేసే హంగామా అంతా ఇంతా కాదు. అభిమాన న‌టుల‌ని చూడాల‌ని, వారి స్క్రీన్ ప్ర‌జెన్స్ ని ఎంజాయ్ చేయాల‌ని ఉళ్లిళ్లూరుతుంటారు. అయితే అలాంటి వారి ముందుకి స్వ‌యంగా అభిమాన న‌టులే ప్ర‌త్య‌క్ష‌మైతే.. త‌న సినిమా చూస్తూ ప్రేక్ష‌కుల రియాక్ష‌న్ ని చూడాల‌ని వాళ్ల మ‌ధ్య‌కే వ‌స్తే... ఎలా వుంటుంది. ఈ ఊహే య‌మ క్రేజీ వుంది క‌దూ.. అలాంటి క్రేజీ ఆలోచ‌న‌ని అమ‌ల్లో పెట్టింది స్టార్ హీరోయిన్ సాయి ప‌ల్ల‌వి.

అమె న‌టించిన తాజా చిత్రం `శ్యామ్ సింగ రాయ్‌`. టాలీవుడ్ ప్రేక్ష‌కుల హృద‌యాల్లో `ఫిదా` సినిమాతో మంచి గుర్తింపుని సొంతం చేసుకుంది. రీసెంట్ గా చేసిన `ల‌వ్ స్టోరీ`తో మ‌రింత చురువ అయింది. ప‌క్కింటి అమ్మాయిలాంటి ఇమేజ్ ని సొంతం చేసుకుని ప్ర‌తీ ఒక్క‌రికీ హాట్ ఫేవ‌రేట్ హీరోయిన్ గా మారింది. తాజాగా అలాంటి సాయి ప‌ల్ల‌వి `శ్యామ్ సింగ రాయ్‌`లో దేవదాసీ పాత్ర‌లో న‌టించింది. రోసీగా ఆమె ప‌లికించిన అభిన‌యం, ప‌తాక ఘ‌ట్టాల్లో ఆమెపై చిత్రీక‌రించిన సాంగ్, సాయి ప‌ల్ల‌వి చేసిన డ్యాన్స్ హాట్ టాపిక్ గా నిలిచిన విషయం తెలిసింది.

నేచుర‌ల్ స్టార్ నాని న‌టించిన ఈ చిత్రం ఈ నెల 24న వ‌ర‌ల్డ్ వైడ్ గా నాలుగు భాష‌ల్లో ప్రేక్ష‌కుల ముందుకొచ్చింది. తొలి షో నుంచి సూప‌ర్ హిట్ టాక్ ని సొంతం చేసుకుని వ‌సూళ్ల వ‌ర్షం కురిపిస్తోంది. ఈ నేప‌థ్యంలో ఈ సినిమా ప్ర‌ద‌ర్శిత‌మ‌వుతున్న థియేట‌ర్ల‌కు మారు వేషంలో వెళ్లి ప్రేక్ష‌కుల్ని సర్‌ప్రైజ్ చేయాల‌ని ప్లాన్ చేసింది. న‌గ‌రంలోని శ్రీ‌రాములు థియేట‌ర్ కు వెళ్లిన సాయి ప‌ల్ల‌వి అక్క‌డి ప్రేక్ష‌కుల్ని సంభ్ర‌మాశ్చార్యాల‌కి లోన‌య్యేలా చేసింది.

ఓ సాధార‌ణ ప్రేక్ష‌కురాలిలా బ్లాక్ బుర‌ఖా ధ‌రించి శ్రీ‌రాములు థియేట‌ర్లోకి ఎంట్రీ ఇచ్చింది. అక్క‌డ ప్రేక్ష‌కుల మ‌ధ్య ఓ సాధార‌ణ ప్రేక్ష‌కురాలిగా కూర్చుని సినిమా చేస్తూ ప్రేక్ష‌కులు స్పందిస్తున్న తీరుని గ‌మ‌నించింది. ప‌క్క‌నే ద‌ర్శ‌కుడు రాహుల్ సంక్రీత్య‌న్ కూడా వున్నాడు. `ప్ర‌ణ‌వాల‌య .. అంటూ మ‌హిశాసుర మ‌ర్థినిగా సాయి ప‌ల్ల‌వి త్రిశూలం ధ‌రించి చేసే నృత్య గీతానికి ప్రేక్ష‌కుల నుంచి ఓ రేంజ్ లో స్పంద‌న, అరుపులు కేక‌లు మొద‌ల‌వ్వ‌డం...

సినిమా పూర్త‌యి ప్రేక్ష‌కుల‌తో పాటు సాయి ప‌ల్ల‌వి బుర్ఖాలో బ‌య‌టికి రావ‌డం.. కారు ద‌గ్గ‌రికి వ‌చ్చాక బుర్ఖా తీసి త‌న ఆనందాన్ని వ్య‌క్తం చేయ‌డం ఆక‌ట్టుకుంటోంది. ఇందుకు సంబంధించిన ఓ వీడియోని మేక‌ర్స్ తాజాగా ఈ వీడియోని విడుద‌ల చేశారు. ప్ర‌స్తుతం ఈ వీడియో నెట్టింట వైర‌ల్ గా మారింది. ఈ వీడియో చూసిన చాలా మంది సాయి ప‌ల్ల‌వి ఏది చేసినా స్సెష‌లే అంటూ ఆమెపై ప్ర‌శంస‌లు కురిపిస్తున్నారు.