హీరోలను 'అన్నయ్యా' అంటున్న స్టార్ హీరోయిన్లు!

హీరోయిన్ అంటే.. హీరో డార్లింగే! స్క్రీన్ పై వాళ్లిద్దరూ రొమాన్స్ చేయాల్సిందే! ఇదే తెలుగు సినిమా ట్రెండ్. ఒకవేళ ఎవరైనా హీరోయిన్.. ఒక హీరోను 'అన్నయ్యా' అని పిలిచిందంటే.. తను నూటికి 99.99% ఫేడ్ అవుట్ అయిపోయిన భామ అని అర్థం. ఇది కూడా ఆ ట్రెండ్ లో భాగమే! అయితే.. ఆ ట్రెండ్ ను మార్చబోతున్నారు ఈ తరం హీరోయిన్లు. ఫామ్ లో ఉండగానే హీరోలకు సిస్టర్లుగా మారిపోతున్నారు! మరి, వాళ్లెవరో ఓ లుక్కేద్దామా?

నయన తార, కాజల్ అగర్వాల్, సాయి పల్లవి.. వీళ్లంతా ప్రస్తుతం వెండి తెరపై వెలుగుతున్న హీరోయిన్లు. వీళ్లలోని హీరోయిన్ కు ఇంకా చాలా లైఫ్ ఉంది. అయినప్పటికీ.. సిస్టర్ రోల్స్ కు మేం రెడీ అంటున్నారు. క్యారెక్టర్ నచ్చి అంగీకరిస్తున్నరా? రెమ్యునరేషన్ టెంప్ట్ చేస్తే ఓకే అంటున్నారో తెలియదు గానీ.. మొత్తానికి హీరోల చెల్లెల్లుగా మారిపోతున్నారు ఈ భామలు.

క్రేజీ రీమేక్‌లో నయన్..
సౌత్ లోనే అగ్ర హీరోయిన్లలో ఒకరు నయన తార. ఈమె స్టార్ డమ్ ఇప్పట్లో వచ్చిన ఢోకా ఏమీలేదు. హీరోయిన్ గా పలు సినిమాల్లో చేస్తూనే ఉంది. మరి, కారణమేంటో తెలియదు కానీ.. చిరంజీవి చెల్లెలి పాత్రకు పచ్చజెండా ఊపేసిందట. 'లూసిఫర్' రీమేక్‌లో నయన తారను చెల్లెలి క్యారెక్టర్‌లో ఫిక్స్ చేసే ప్లాన్‌లో ఉన్నారట డైరెక్టర్ మోహన్ రాజా. 'సైరా'లో చిరంజీవికి జోడీగా కనిపించిన నయన్.. అన్నీ ఓకే అయితే.. 'లూసీఫర్' రీమేక్ లో మెగాసిస్టర్ గా కనిపించబోతోంది.

బన్నీ చెల్లెలిగా పల్లవి..
ఇక, సాయి పల్లవి కూడా సెలక్టివ్ గా సినిమాలను ఎంచుకుంటూ.. తనదైన స్టైల్లో హీరోయిన్ గా దూసుకెళ్తోంది. అలాంటి సాయిపల్లవి బన్నీతో చెల్లి క్యారెక్టర్లో స్క్రీన్ షేర్ చేసుకోబోతోందట. సుకుమార్-బన్నీ కాంబినేషన్లో తెరకెక్కుతున్న పాన్ ఇండియన్ ఫిలిం 'పుష్ప' సినిమాలో సిస్టర్ పాత్రలో కనిపించనుందట ఈ డ్యాన్స్ బేబీ. మైత్రి మూవీ మేకర్స్ భారీగా ప్లాన్ చేసిన ఈ మూవీకి తమిళ్, మళయాళంలో మరింత బలం చేకూర్చేందుకు సాయి పల్లవిని సిస్టర్‌గా చూపించబోతున్నారని టాక్ నడుస్తోంది.

విష్ణు సోదరిగా కాజల్..
ఇక, మరో స్టార్ హీరోయిన్ కాజల్ అగర్వాల్ కూడా సిస్టర్ గా మారిపోతోందట. ఇటు సౌత్‌తో అటు నార్త్‌లో సినిమాలు చేస్తోంది. దాదాపు 10 ఏళ్లకు పైగా టాప్ హీరోయిన్‌గా కొనసాగుతోంది. ప్రస్తుతం ఆచార్య సినిమాలో హీరోయిన్ గా నటిస్తోంది. అలాంటి కాజల్ కూడా ఫస్ట్ టైమ్ సిస్టర్ రోల్ ప్లే చేయబోతోంది. మంచు విష్ణు హీరోగా నటిస్తున్న 'మోసగాళ్లు' సినిమాలో సిస్టర్‌గా కనిపిస్తోంది.

వదినగా రేణు దేశాయ్..
మరో టాలీవుడ్ సెన్సేషన్ రేణు దేశాయ్ కూడా మరో స్టార్ హీరోకి వదినగా కనిపించబోతోందని టాక్ నడుస్తోంది. పరశురామ్ -మహేష్ బాబు కాంబినేషన్లో తెరకెక్కబోతున్న 'సర్కారు వారి పాట' సినిమాలో మహేష్ బాబుకు వదినగా రేణు దేశాయ్ నటిస్తోందంటూ సోషల్ మీడియాలో న్యూస్ చక్కర్లు కొడుతోంది.

మొత్తానికి.. స్టార్ హీరోయిన్లు ఓ వైపు గ్లామర్ రోల్స్ పోషిస్తూనే.. మరోవైపు నటనకు ప్రాధాన్యమున్న పాత్రలను ఎంచుకుంటున్నారన్నమాట. చూడాలి మరి.. వీరిని ఫ్యాన్స్ ఏ విధంగా రిసీవ్ చేసుకుంటారో!