మహేష్ వెబ్ సీరీస్ లో చార్లీ ఎవరు?

సూపర్ స్టార్ మహేష్ బాబు నటన మాత్రమే కాకుండా బిజినెస్ పై కూడా ఫోకస్ చేస్తున్నాడు. ఇప్పటికే ఎంబీ ఎంటర్టైన్మెంట్స్ బ్యానర్ స్థాపించి తను నటించిన కొన్ని సినిమాలకు నిర్మాణ భాగస్వామిగా వ్యహరించాడు. రీసెంట్ గా ఎఎంబీ సినిమాస్ బ్రాండ్ తో మల్టిప్లెక్స్ బిజినెస్ లోకి ఎంటర్ అయ్యాడు. ఇదిలా ఉంటే మహేష్ బాబు వెబ్ సీరీస్ నిర్మాణంలో కూడా అడుగుపెడుతున్నాడని వార్తలు వస్తున్నాయి.

ఈ వెబ్ సీరీస్ నిర్మాణం అంతా మహేష్ వైఫ్ నమ్రత పర్యవేక్షణలో జరుగుతుందని అంటున్నారు. 'నాన్నకు ప్రేమతో' సినిమాకు పనిచేసిన హుస్సేన్ షా కిరణ్ ఈ వెబ్ సీరిస్ కు దర్శకత్వం వహిస్తాడని సమాచారం. 'చార్లీ' టైటిల్ తో తెరకెక్కనున్న 8-ఎపిసోడ్ల వెబ్ సీరీస్ కు హుస్సేన్ ఆల్రెడీ స్రిప్ట్ రెడీ చేశాడట. ప్రాజెక్టు అంతా సెట్ అయిందిగానీ ఈ వెబ్ సీరీస్ కు హీరో మాత్రం ఇంకా సెట్ కాలేదట. ఈ విషయంలో చాలా రూమర్లే ప్రచారంలో ఉన్నాయి. డైరెక్టర్ ఓ కొత్త నటుడిని పరిచయం చేస్తే బాగుంటుందని భావిస్తున్నాడట. దీంతో మహేష్ తన ఫ్యామిలీ నుండి ఒకరిని తీసుకుందామని అనుకుంటున్నాడట.

మహేష్ అన్నయ్య కొడుకు..మేనల్లుడు ఇద్దరూ హీరోగా ఎంట్రీ ఇవ్వాలని ఎదురు చూస్తున్నారు. దీంతో ఇద్దరిలో ఒకరిని హీరోగా పరిచయం చేసే ఆలోచనలో ఉన్నాడని టాక్. మరి ఇది నిజమేనా కదా అన్నది కొన్ని రోజులు ఆగితే కానీ మనకు తెలిసే అవకాశం లేదు. ఏదేమైనా మహేష్ బాబు వెబ్ సిరీస్ లో ఎవరు హీరోగా నటిస్తారనే విషయం మాత్రం ఒక హాట్ టాపిక్ అయింది.