ఆ అవార్డుల వేడుకకు ఐదు కోట్లు పెట్టేస్తున్నారా?

తెలుగులో చాలా టీవీ ఛానెళ్లున్నాయి. కానీ వాటన్నింట్లోకి మాటీవీ రేంజే వేరు. ఈ ఛానెల్ వచ్చినపుడు ఇది కూడా అన్నింట్లో ఒకటనే అనుకున్నారు. కానీ చాలా వేగంగా తనకంటూ ఓ ప్రత్యేకత సంతరించుకున్న ఈ ఛానెల్.. ఇంతింతై అన్నట్లు ఎదిగిపోయింది. నాగార్జున.. నిమ్మగడ్డ ప్రసాద్.. చిరంజీవి.. అల్లు అరవింద్ లాంటి దిగ్గజాలందరూ కలిసి మా టీవీని ఎక్కడికో తీసుకెళ్లారు. స్టార్ టీవీ లాంటి బడా సంస్థ.. వేల కోట్ల డీల్ తో ఈ ఛానెల్ ను సొంతం చేసుకోవడం పెద్ద సంచలనం అయింది. స్టార్ చేతుల్లోకి వెళ్లాక ‘మా’ రేంజి మరింత పెరిగింది. ‘స్టార్’ స్థాయికి తగ్గట్లుగా ఈ సారి మా టీవీ అవార్డుల కార్యక్రమాన్ని కూడా ఓ రేంజిలో నిర్వహించడానికి సన్నాహాలు జరుగుతున్నాయి.

ఏటా జరిగే ‘మా’ టీవీ అవార్డుల్ని ఒకప్పుడు లైట్ తీసుకునే వాళ్లు కానీ.. గత కొన్నేళ్లలో వీటికి వాల్యూ బాగా పెరిగింది. రాష్ట్ర విభజన తర్వాత నంది అవార్డులు కూడా కొండెక్కేసిన నేపథ్యంలో వీటిని ప్రత్యేకంగా చూస్తున్నారు. ఆ అవార్డుల వేడుకను నిర్వహించే తీరు కూడా జనాల్ని బాగా ఆకర్షిస్తుంది. ఆ రోజు ఇండస్ట్రీ ఇండస్ట్రీ అంతా వేడుకలు జరిగే ఆడిటోరియంలోనే ఉంటుంది. సరదా కార్యక్రమాలతో చాలా గ్రాండ్ గా ఈ వేడుకను నిర్వహిస్తున్న మా యాజమాన్యం. ఈసారి స్టార్ వాళ్లు మరింత పెద్ద స్థాయిలో ఏకంగా రూ.5 కోట్ల బడ్జెట్ తో ఈ వేడుకను నిర్వహిస్తున్నారట. ఈసారి చాలా స్పెషల్ అనిపించే కార్యక్రమాలు ప్లాన్ చేశారట. మెగాస్టార్ చిరంజీవి - కింగ్ నాగార్జున సహా చాలామంది ప్రముఖులు ఈ వేడుకలో సందడి చేయనున్నారు. ఈ ఆదివారమే మాటీవీ అవార్డుల పండగ.