'ఆహా'ను అభినందించిన స్టైలిష్ స్టార్..!!

తెలుగు స్టార్ ప్రొడ్యూసర్స్ లో ఒకరైన అల్లు అరవింద్ గతేడాది ఫిబ్రవరి 8న ఓ వినోదభరిత ఓటిటి ప్లాట్ ఫామ్ ఒకటి ప్రారంభించారు. టాలీవుడ్ ఇండస్ట్రీకి చెందిన లఘుచిత్రాలు, సినిమాలు అలాగే వెబ్ సిరీస్‌లకు సపోర్ట్ ఇవ్వాలనే ఉద్దేశ్యంతో ప్రారంభించిన ఫస్ట్ తెలుగు ఓటిటి ఆహా. అది ప్రారంభమైనప్పటి నుండి నేటికి మొదటి వార్షికోత్సవం కావడంతో ఆహా టీమ్ లో సంబరాలు మొదలయ్యాయి. గతేడాది లాక్ డౌన్ ముందు మొదలైన ఈ ఆహా స్ట్రీమింగ్ లో ఎన్నో తెలుగు సినిమాలు, కొత్త పాత ఇలా అన్ని అందుబాటులోకి తీసుకొస్తున్నారు అరవింద్. అయితే ఆహా భాగస్వాములలో ఒకరైన అల్లు అర్జున్ ఫస్ట్ అనివెర్సరీ సందర్భంగా ఆహాకు శుభాకాంక్షలు తెలిపి ఇలాగే విజయవంతంగా కొనసాగాలని ట్వీట్ రూపంలో కోరుకున్నాడు.

ట్విట్టర్ వేదికగా బన్నీ "ఈరోజుతో ఆహాకు మొదటి వార్షికోత్సవం. ఈనాటివరకు ఆహా అద్భుతంగా వినోదాత్మకంగా కొనసాగింది. ఇకముందు కూడా అలాగే కొనసాగాలని కోరుతూ ఆహా బృందానికి అభినందనలు!" అని ట్వీట్ చేసి సర్ప్రైజ్ ఇచ్చాడు. ఆహా కంటెంట్ విషయంలోకి వస్తే.. మొదటగా నవదీప్ ప్రధాన పాత్రలో నటించిన మస్తీ అనే సిరీస్ తో ఆహా ప్రయాణం మొదలైంది. అందులో బిందుమాధవి, రాజా, చాందిని చౌదరి, హెబ్బాపటేల్ లాంటి వారు నటించారు. ఆ తర్వాత వచ్చిన సిన్, కొత్తపోరడు వెబ్ సిరీస్ లు ప్రేక్షకులను బాగా ఆకర్షించాయి. మధ్యలో చాలా సినిమాలు అవి ఇవి వచ్చినా పెద్దగా ఆకట్టుకోలేదుగాని ఏడాది చివరిలో స్టార్ హీరోయిన్ సమంత హోస్ట్ చేసిన 'సామ్ జామ్' షో ప్రేక్షకులను బాగా పెంచగలిగింది. ఈ షో ద్వారా విజయ్ దేవరకొండ, మెగాస్టార్ చిరు, నాగచైతన్య, అల్లు అర్జున్ తదితరులు పాల్గొని ఆహాకు సపోర్ట్ చేశారు. మొత్తానికి ఆహా విజయవంతంగా మొదటి సంవత్సరం పూర్తిచేసుకుంది.