మామ పుట్టిన‌రోజున అల్లుడి పండ‌గ‌

ఈసారి మెగాస్టార్ పుట్టిన‌రోజుకి భారీ సంద‌డి నెల‌కొన‌బోతోంది. రీ ఎంట్రీ సినిమాని ప్ర‌క‌టిస్తుండ‌టంతో పాటు, అభిమానులంద‌రినీ ఆ రోజు చిరు ప్ర‌త్య‌క్షంగా క‌లుసుకోబోతున్నాడు. ఆ రోజు ఒకే వేదిక‌పైకి ప‌వ‌న్‌, చిరు వ‌స్తార‌ని కూడా ప్ర‌చారం సాగుతోంది. దీంతో ఫిల్మ్‌ న‌గ‌ర్ కోలాహ‌లంగా మార‌బోతోంది. ఇప్పుడు అల్లుడు సాయిధ‌ర‌మ్ తేజ్ కూడా ఆ రోజే త‌న సినిమా పాట‌ల పండ‌గ చేసుకొనేందుకు సిద్ధ‌మ‌య్యాడు. అంటే పొద్దున్నుంచి రాత్రి వ‌ర‌కు సంద‌డే సంద‌డ‌న్న‌మాట‌. అంతే కాదండోయ్‌... ఆ రోజునే నాగ‌బాబు త‌న‌యుడు వ‌రుణ్‌ తేజ్ సినిమాకి సంబంధించిన ట్రైల‌ర్ కూడా విడుద‌ల కావొచ్చు అంటున్నారు. చెర్రీ సినిమాకి సంబంధించి కూడా ఏదైనా టీజ‌ర్‌ లాంటిది బ‌య‌టికి రావొచ్చు. మొత్త‌మ్మీద మెగా అభిమానుల‌కి కావ‌ల్సినంత ఉత్సాహాన్ని చిరు ఫ్యామిలీ అందించ‌బోతోంది. సాయిధ‌రమ్ తేజ్ `సేల్ ఫ‌ర్ సుబ్ర‌మ‌ణ్యం` ఆడియో ఫంక్ష‌న్ మాత్రం ప‌క్కాగా ఖరారై పో్యింది.

హ‌రీష్ శంక‌ర్ ద‌ర్శ‌క‌త్వంలో సాయిధ‌ర‌మ్ తేజ్ కథానాయ‌కుడిగా తెర‌కెక్కిన చిత్ర‌మే `సేల్ ఫ‌ర్ సుబ్రమ‌ణ్యం`. దిల్‌ రాజు నిర్మాత‌. సినిమా షూటింగ్ మొత్తం కంప్లీట్ అయ్యింది. నిన్న‌నే రిలీజ్ డేట్‌ ని కూడా క‌న్ఫ‌మ్ చేశారు. వినాయ‌క చ‌వితిని పుర‌స్క‌రించుకొని సెప్టెంబ‌రు 24న విడుద‌ల చేయ‌బోతున్నారు. ఈ చిత్రం అమెరికా నేప‌థ్యంలో సాగుతుంద‌ని స‌మాచారం. `రామ‌య్యా వ‌స్తావ‌య్యా` త‌ర్వాత హ‌రీష్ శంక‌ర్ తీసిన చిత్ర‌మిది. ఇటు ఇండస్ట్రీ, అటు ప్రేక్ష‌కులు భారీగా అంచ‌నాలు పెంచుకొన్నారు.