సుదీప్ కూడా ఒక్కడుగా వస్తున్నాడు

టాలీవుడ్ లో కిచ్చా సుదీప్ బాగా తెలిసిన పేరే. ఈగ మూవీలో విలన్ గా సుదీప్ నటనను మరిచిపోవడం అసాధ్యం. బాహుబలిలో చిన్న పాత్రే చేసిన తన మార్క్ వేసిన సుదీప్.. రీసెంట్ గా ఓ హిట్ కొట్టాడు. కన్నడ మూవీ కోటిగొబ్బ 2తో ఈ హీరో సక్సెస్ సాధించగా.. దీన్ని తెలుగులోకి తీసుకొచ్చేందుకు రెడీ అవుతున్నారు.

కోటిగొబ్బ2ను.. తెలుగులో కోటికొక్కడు టైటిల్ తో రిలీజ్ కానుంది. ఈ మధ్య ఒక్కడు టైటిల్ కి బాగానే డిమాండ్ పెరిగింది. ఇంకొక్కడు.. అప్పట్లో ఒకడుండేవాడు.. మనలో ఒకడు.. ఇలా వరుసగా ఒకడుని లింక్ చేసి సినిమాలు వచ్చేస్తున్నాయి. ఈ లిస్ట్ లో కిచ్చా సుదీప్ కూడా చేరనుండగా.. ఈ మూవీలో సుదీప్ కి జోడీగా ట్యాలెంటెడ్ బ్యూటీ నిత్యామీనన్ నటించడం విశేషం. తెలుగు ప్రేక్షకులకు బాగానే పరిచయం ఉన్న కేఎస్ రవికుమార్ దర్శకత్వంలో ఈ చిత్రం రూపొందింది.

కమర్షియల్ ఎలిమెంట్స్ ఫుల్లుగా ఉండే ఈ సినిమాలో.. సుదీప్ పాత్ర రెండు వేరియేషన్స్ మధ్య సాగుతూ ఉంటుంది. విక్రమ్ అపరిచితుడు టైప్ లో లోపలి నుంచి ఇంకో కేరక్టర్ బయటకొచ్చేస్తుందన్న మాట. అయితే.. ఆ మూవీలో మాదిరగా.. ఎలాంటి రోగం ఉండదు కానీ.. మాస్ ఎలిమెంట్స్ మాత్రం బోలెడన్ని ఉంటాయి. టాలీవుడ్ ప్రేక్షకులను ఈ కోటికొక్కడు ఆకట్టుకునే అవకాశాలు ఎక్కువగానే ఉన్నాయి.