ఆ బయోపిక్ ఏమైనట్లు?

బాలీవుడ్లో కొన్నేళ్లుగా బయోపిక్ ల హవా నడుస్తోంది. తెలుగులో కూడా ఇప్పుడు ఈ సంస్కృతి ఊపందుకునేలా కనిపిస్తోంది. ఇటీవలే ‘మహానటి’ సినిమా అద్భుత విజయాన్నందుకుంది. క్రిష్ రాకతో ఎన్టీఆర్ బయోపిక్ కు కూడా ఊపొచ్చింది. వైఎస్ రాజశేఖర్ రెడ్డి జీవిత కథతో తెరకెక్కనున్న ‘యాత్ర’కు కూడా జోరుగా సన్నాహాలు జరుగుతున్నాయి. వీటితో పాటు ఇంకో రెండు మూడు బయోపిక్స్ గురించి చర్చ జరిగింది. అందులో బ్యాడ్మింటన్ కోచ్ పుల్లెల గోపీచంద్ జీవిత కథతో తెరకెక్కాల్సిన సినిమా ఒకటి. ఈ సినిమా గురించి గత ఏడాది చాలా చర్చ నడిచింది. స్క్రిప్ట్.. ప్రి ప్రొడక్సణ్ కూడా జోరుగా నడుస్తున్నట్లు వార్తలొచ్చాయి. ఈ చిత్రంలో సుధీర్ బాబు హీరోగా నటిస్తాడని.. ప్రవీణ్ సత్తారు దర్శకుడని అన్నారు. ‘గరుడవేగ’ టైంలో ప్రవీణ్ కూడా ఈ ప్రాజెక్టు గురించి మాట్లాడాడు. దీనికి సంబంధించి పని నడుస్తోందన్నారు.

కానీ ఆ తర్వాత దీని ఊసే లేదు. ఒక పెద్ద బాలీవుడ్ నిర్మాణ సంస్థ ఈ చిత్రాన్ని టేకప్ చేసిందని.. వాళ్లు తమ రచయితల బృందంతో స్క్రిప్టు మీద పని చేస్తున్నారని.. ప్రి ప్రొడక్షన్ కూడా ప్లాన్ చేస్తున్నారని అన్నారు. కానీ నెలలు నెలలు గడిచిపోయాయి. దాని గురించి అప్ డేట్ ఏమీ లేదు. అసలు ఆ నిర్మాణ సంస్థ సుధీర్ బాబు-ప్రవీణ్ కాంబినేషన్లోనే ఈ చిత్రం చేయాలనుకుంటోందా అన్న సందేహాలు కలుగుతున్నాయి. అసలు ఈ ప్రాజెక్టు ఉందా లేదా అన్న డౌట్లు కూడా లేకపోలేదు. రామ్ హీరోగా చేయాల్సిన ప్రాజెక్టు ఆగిపోయిన నేపథ్యంలో ప్రవీణ్.. గోపీ బయోపిక్ విషయంలో ఏమైనా కదలిక తెస్తాడేమో చూడాలి. ప్రవీణ్ సంగతేమో కానీ.. ఈ చిత్రంలో సుధీర్ బాబు నటించడం మాత్రం సందేహమే అంటున్నారు. నేషనల్ లెవెల్లో పెద్ద ఎత్తున ఈ చిత్రం చేయాలన్న ఆలోచన నిర్మాణ సంస్థకు ఉండటంతో బాలీవుడ్ నటుడితోనే సినిమా చేయడానికి ఆలోచిస్తున్నట్లు కూడా ఇంతకుముందే వార్తలొచ్చాయి. మరి ఈ సినిమాపై తర్వాతి అప్ డేట్ ఎప్పుడొస్తుందో చూడాలి.