డెబ్యూ డైరెక్టర్ని నోలన్‌ తో పోల్చేశాడే..

నారా రోహిత్.. శ్రీవిష్ణు.. సుధీర్ బాబు.. శ్రియల ఆసక్తికర కాంబినేషన్లో తెలుగులో ఓ మల్టీస్టారర్ తెరెక్కుతున్న సంగతి తెలిసిందే. ఆ సినిమా పేరు.. ‘వీరభోగ వసంత రాయలు’. టైటిల్ తో పాటు ఈ కాంబినేషన్ కూడా ఆసక్తి రేకెత్తించేదే. ఈ చిత్రంతో ఇంద్రసేన అనే కొత్త దర్శకుడు తెలుగు తెరకు పరిచయం కాబోతున్నాడు. ఈ దర్శకుడిని హీరో సుధీర్ బాబు.. ప్రఖ్యాత హాలీవుడ్ దర్శకుడు క్రిస్టోఫర్ నోలన్‌తో పోల్చడం విశేషం.

‘వీర భోగ వంతసరాయలు’ సినిమా టాలీవుడ్లో ఒక ట్రెండ్ సెట్టర్ అవుతుందని.. ఇలాంటి సినిమా ఇంతకుముందెన్నడూ మన దగ్గర రాలేదని.. దర్శకుడు ఇంద్రసేన తొలి సినిమాతోనే బలమైన ముద్ర వేస్తాడని.. అతడిని తాను నోలన్‌తో ఎందుకు పోల్చానో సినిమా చూశాక అందరికీ అర్థమవుతుందని సుధీర్ బాబు కాన్ఫిడెంటుగా చెప్పడం విశేషం.

రోహిత్-సుధీర్ కలిసి ఇంతకుముందు ‘శమంతకమణి’ సినిమా చేశారు. రోహిత్-శ్రీవిష్ణు కలిసి ‘అప్పట్లో ఒకడుండేవాడు’తో పాటు ఇంకో రెండు మూడు సినిమాల్లో కనిపించారు. ఇప్పుడు ఈ ముగ్గురూ కలిసి ‘వీర భోగ వసంతరాయలు’ చేస్తున్నారు. వీళ్లందరి కంటే సీనియర్ అయిన శ్రియ కూడా ఇందులో ఓ పాత్ర చేయడం విశేషమే. ఈ చిత్రం ఈ ఏడాది ఆఖర్లో ప్రేక్షకుల ముందుకొస్తుందట. మరి సుధీర్ చెబుతున్నట్లుగా అంత ప్రత్యేకత ఈ సినిమాలో ఏముందో చూద్దాం మరి.