సినిమా వేస్టే.. సుధీర్ కాదు

ఈ ఏడాది మోస్ట్ అవైటెడ్ బాలీవుడ్ మూవీస్ లో ఒకటైన ‘బాఘి’ ఈ శుక్రవారం ప్రేక్షకుల ముందుకొచ్చేసింది. రెండు నెలల కిందట వచ్చిన ట్రైలర్లో హాలీవుడ్ స్థాయి యాక్షన్ సీక్వెన్స్ చూసి జనాలకు కళ్లు చెదిరిపోయింది. దీంతో సినిమా మీద భారీ అంచనాలు పెట్టుకున్నారు. కానీ నిన్న సినిమా చూసిన జనాలకు చేదు అనుభవమే మిగిలింది. ఈ సినిమా రెండున్నర గంటల పాటు ప్రేక్షకుల సహనాన్ని పరీక్షించిందన్న టాక్ వినిపిస్తోంది. ప్రథమార్ధం పర్వాలేదనిపించినా.. ద్వితీయార్ధం మాత్రం దారుణం అంటున్నారు. ఫైట్లు తప్ప సినిమాలో ఇంకేమీ లేవని విమర్శిస్తున్నారు అందరూ.

మన తెలుగు ప్రేక్షకులు సైతం ఈ సినిమా మీద ఎంతో ఆసక్తి ప్రదర్శించారు. దీనికి కారణం..మహేష్ బావ సుధీర్ బాబు ఇందులో విలన్ పాత్ర పోషించడమే. ‘వర్షం’ ఆధారంగా తెరకెక్కిన ఈ సినిమాలో తెలుగులో గోపీచంద్ పోషించిన పాత్రను సుధీర్ రీప్లేస్ చేశాడు. హిందీలో విలన్ నేపథ్యం పూర్తిగా మార్చేశారు. విలన్ని మార్షల్ ఆర్ట్స్ లో పండిపోయిన వాడిగా చూపించారు. ఆ పాత్ర కోసం ఎంతో కష్టపడ్డాడు సుధీర్. సినిమాలోనూ అతడి కష్టం కనిపించింది.

బాలీవుడ్ వాళ్లకు కూడా కళ్లు చెదిరిపోయేలా అదిరిపోయే రేంజిలో యాక్షన్ సీక్వెన్స్ పెర్ఫామ్ చేశాడు సుధీర్. అతడి నటన.. లుక్.. యాక్షన్ సీక్వెన్స్ లో పెర్ఫామెన్స్ అన్నీ కూడా ప్రేక్షకులకు నచ్చాయి. రివ్యూల్లో కూడా సుధీర్ పెర్ఫామెన్స్ గురించి ప్రత్యేకంగా ప్రస్తావిస్తున్నారు. మొత్తానికి సినిమా ‘చెత్త’ అనిపించుకున్నప్పటికీ సుధీర్ బాబుకు మాత్రం మంచి మార్కులే పడ్డాయి. కాబట్టి బాలీవుడ్ లో మనోడికి మరిన్ని అవకాశాలు వచ్చే ఛాన్సుంది.