బావ గారు మళ్ళీ వచ్చేస్తున్నారు

మహేష్‌ బాబు సపోర్టుతో బండిని గట్టిగా లాగించేద్దామని ఫిక్సయ్యి, గత సినిమాకు మహేష్‌ అస్సలు హెల్ప్‌ చేయలేదని కాస్త దిగాలు చెందాడు కృష్ణ గారి అల్లుడు సుధీర్‌ బాబు. మొన్ననే మోసగాళ్ళకు మోసగాడు అంటూ ఓ సినిమాతో విచ్చేశాడు. సినిమాను కొన్ని మీడియా సంస్థలు నెగెటివ్‌గా ప్రమోట్‌ చేశాయంటూ రచ్చ లేపేశాడు. క్రిటిక్స్‌ అనేవాళ్ళను ఉతికి ఆరేశాడు.. కట్‌ చేస్తే..

ఆ సినిమా ఫ్లాపని ఇంకా ఎవ్వరూ మర్చిపోకముందే మనోడు మరో సినిమాతో వస్తున్నాడు. కన్నడంలో హిట్టయిన ఓ సినిమాను ''కృష్ణమ్మ కలిపింది ఇద్దరినీ'' అనే పేరుతో సుధీర్‌, నందిత జంటగా రూపొందించారు. బహుశా ప్రేమకథా చిత్రమ్‌ మ్యాజిక్‌ రిపీట్‌ అవుతుందని కాబోలు.. ఈ సినిమా రిలీజ్‌ కోసం లగడపాటి శ్రీధర్‌ చాలా రోజుల నుండి మంచి డేట్‌ కోసం వెయిట్‌ చేస్తున్నాడు. ఇప్పటికే ప్యాక్‌డ్‌గా ఉన్న జూన్‌ 19 మనోళ్ళకు తెగ నచ్చేసింది.

డైనమైట్‌, వినవయ్యా రామయ్యా తదితర సినిమాలు విడుదలవుత్ను రోజునే తన సినిమాను కూడా సుధీర్‌ బరిలోకి దింపుతున్నాడు. మొన్ననే కదయ్యా బాబూ ఓ సినిమాతో వచ్చావ్‌ కాస్త గ్యాప్‌ ఇవ్వవూ అంటే.. మా మావగారు ఓ ఏడాదిలో 13 సినిమాలు చేస్తే లేదుకాని, నేను ఓ నెల గ్యాప్‌లో రెండు సినిమాలు రిలీజ్‌ చేస్తే ఏముందిలే అన్నట్లు ఎక్స్‌ప్రెషన్‌ పెట్టాడు మహేష్‌ బావ. అది సంగతి.