గోపీచంద్ బయోపిక్‌ లో ఉన్నట్టా లేనట్టా?

భారత బ్యాడ్మింటన్‌ ను తిరుగులేని స్థాయికి తీసుకెళ్లిన కోచ్ గోపీచంద్ జీవిత కథతో సినిమా తీయడానికి రెండేళ్ల కిందటే సన్నాహాలు మొదలయ్యాయి. గోపీకి మిత్రుడైన హీరో సుధీర్ బాబే ఈ ప్రాజెక్టును ముందుకు తీసుకెళ్లాడు. ప్రవీణ్ సత్తారు గోపీ జీవితాన్ని అధ్యయనం చేసి స్క్రిప్టు కూడా తీర్చిదిద్దాడు. ఐతే ముందు చిన్న స్థాయిలో అనుకున్న ఆ ప్రాజెక్టు ఆ తర్వాత పెద్ద స్థాయికి చేరుకుంది. ప్రముఖ హాలీవుడ్ నిర్మాణ సంస్థ ఫాక్స్ స్టార్ ఈ ప్రాజెక్టును టేకప్ చేయడంతో దీని రేంజ్ మారిపోయింది. ప్రస్తుతం ప్రవీణ్ సత్తారు ప్రమేయం కూడా పెద్దగా లేకుండా ఫాక్స్ స్టార్ ఇండియా వాళ్లకు చెందిన పెద్ద టీం ఈ సినిమా మీద పని చేస్తున్నట్లు సమాచారం.

ఈ సినిమాకు సంబంధించి అందుతున్న తాజా సమాచారం ప్రకారం ఇందులో సుధీర్ బాబే గోపీచంద్ పాత్ర చేస్తాడన్నది సందేహంగా మారింది. ఎందుకంటే ఈ ప్రాజెక్ట్ రీచ్ చూసుకున్నాక ఇంకా పెద్ద స్థాయి నటుడైతే.. స్టార్ అయితే బాగుంటుందని ఫాక్స్ స్టార్ వాళ్లు భావిస్తున్నట్లు సమాచారం. అందుకే ఇటు ప్రవీణ్ సత్తారు ఈ ప్రాజెక్టు గురించి మాట్లాడేటపుడు సుధీర్ బాబే హీరో అని చెప్పలేదు. అటు సుధీర్ బాబు సైతం కాన్ఫిడెంటుగా తానీ సినిమాలో నటించబోతున్నట్లు చెప్పట్లేదు. ఇద్దరూ వెయిట్ అండ్ సీ అన్నట్లుగా వ్యవహరిస్తున్నారు. స్వతహాగా బ్యాడ్మింటన్ క్రీడాకారుడు కావడం.. గోపీతో సాన్నిహిత్యం వల్ల అతడి గురించి అన్నీ తెలిసి ఉండటం సుధీర్ బాబుకున్న సానుకూల అంశాలే. అదే సమయంలో నటుడిగా అతడింకా పెద్దగా రుజువు చేసుకున్నది లేదు. హీరోగా ఒక ఇమేజ్ కూడా లేదు. ఇవి ప్రతికూలతలుగా కనిపిస్తున్నాయి. మరి సుధీర్ ఈ ప్రాజెక్టులో ఉంటాడా లేదా అన్నదానిపై ఇంకొన్ని రోజుల్లో స్పష్టత వచ్చే అవకాశముంది.