'శ్రీదేవి సోడా సెంటర్' సెన్సార్ పూర్తి.. సినిమా నిడివి ఎంతంటే..?

'పలాస 1978' ఫేమ్ కరుణ కుమార్ దర్శకత్వంలో సుధీర్ బాబు హీరోగా రూపొందిన తాజా చిత్రం ''శ్రీదేవి సోడా సెంటర్''. ఇందులో ఆనంది హీరోయిన్ గా నటించింది. రూరల్ యాక్షన్ ఎంటర్టైనర్ గా తెరకెక్కుతోన్న ఈ చిత్రాన్ని ఆగస్టు 27న థియేటర్లలో విడుదల చేస్తున్నారు. ఈ నేపథ్యంలో ఇప్పటికే వదిలిన ప్రచార చిత్రాలు - టీజర్ మంచి స్పందన తెచ్చుకున్నాయి. అలానే ఇటీవల సూపర్ స్టార్ మహేష్ బాబు చేతుల మీదుగా రిలీజైన ట్రైలర్ సినిమాపై అంచనాలు పెంచేసింది.

ఇకపోతే 'శ్రీదేవి సోడా సెంటర్' సినిమాకు సంబంధించిన సెన్సార్ కార్యక్రమాలను కూడా పూర్తి చేశారు. తాజాగా ఈ విషయాన్ని వెల్లడించిన చిత్ర యూనిట్.. సెన్సార్ బోర్డ్ ఈ చిత్రానికి 'యూ/ఏ' (U/A) సర్టిఫికేట్ జారీ చేసినట్లు తెలిపారు. ఈ సినిమా రన్ టైమ్ రెండున్నర గంటలు (2 గంటల 34 నిమిషాలు) వచ్చినట్లు తెలుస్తోంది. ఈ సందర్భంగా విడుదల చేసిన సుధీర్ బాబు - ఆనంది అందమైన పోస్టర్ ఆకట్టుకుంటోంది.

విడుదల తేదీ దగ్గర పడుతుండటంతో 'శ్రీదేవి సోడా సెంటర్' మేకర్స్ అగ్రిసివ్ గా ప్రమోషన్స్ చేస్తున్నారు. ఇటీవలే నిర్వహించిన ప్రీ రిలీజ్ ఈవెంట్ గ్రాండ్ సక్సెస్ అయింది. పాన్ ఇండియా స్టార్ ప్రభాస్ సైతం ఈ సినిమా స్టొరీ తెలుసుకొని చిత్ర బృందాన్ని అభినందించి, తన విషెస్ తెలియజేసారు. కెరీర్ ప్రారంభం నుంచీ విభిన్నమైన సినిమాలు చేస్తూ వస్తున్న సుధీర్ బాబు.. లైటింగ్ సూరిబాబు గా కనిపించనున్న ఈ సినిమా ఎలాంటి విజయాన్ని అందిస్తుందో చూడాలి.

ఇప్పటికే ఈ చిత్రంలో విలన్ గా నటిస్తున్న పావెల్ నవగీతన్ ని పరిచయం చేసిన చిత్ర యూనిట్.. తాజాగా సోడాల శ్రీదేవి తండ్రి సంజీవ్ రావు గా నటించిన సీనియర్ నరేష్ కు సంబంధించిన ఓ వీడియోని రిలీజ్ చేశారు. సోడా కొట్టు ఓనర్ గా.. కూతురిపై అమితమైన ప్రేమ గల తండ్రిగా.. పరువు కోసం తాపత్రయ పడే కుటుంబ పెద్దగా ఈ సినిమాలో నరేష్ పాత్ర ఉంటుందని తెలుస్తోంది. ఈ పాత్ర సినిమా సక్సెస్ కు ఏ విధంగా దోహదపడుతుందో చూడాలి.

'శ్రీదేవి సోడా సెంటర్' చిత్రానికి సంగీత బ్రహ్మ మణిశర్మ మ్యూజిక్ కంపోజ్ చేశారు. శ్యామ్ దత్ సైనుద్దీన్ సినిమాటోగ్రఫీ అందించగా.. శ్రీకర్ ప్రసాద్ ఎడిటింగ్ బాధ్యతలు నిర్వర్తించారు. ఈ చిత్రంలో సత్యం రాజేష్ - రఘుబాబు - అజయ్ - హర్షవర్ధన్ - సప్తగిరి - రోహిణి తదితరులు ఇతర పాత్రల్లో నటించారు. 70mm ఎంటర్టైన్మెంట్స్ బ్యానర్ పై విజయ్ చిల్లా - శశి దేవిరెడ్డి సంయుక్తంగా ఈ చిత్రాన్ని నిర్మించారు. 'భలే మంచి రోజు' తర్వాత ఈ బ్యానర్ లో సుధీర్ బాబు చేస్తున్న రెండో సినిమా ఇది. మరి 'శ్రీదేవి సోడా సెంటర్' చిత్రం థియేటర్స్ లో ఎలాంటి సౌండింగ్ చేస్తుందో చూడాలి.