ఆ అమ్మాయి క‌ళ్ల‌లో క‌ళ్లు పెట్టి చూస్తే ఉప్పెనే

ఆ అమ్మాయి గురించి మీకు చెప్పాలి.. ! టైటిల్ తోనే క్యూరియాసిటీ పెంచారు సుధీర్ బాబు - ఇంద్ర‌గంటి బృందం. కృతి శెట్టి లాంటి అంద‌మైన ప్ర‌తిభావంతురాలైన న‌టిని ఎంపిక చేసుకోవ‌డ‌మే గాక‌.. ఈ సినిమాని రొమాంటిక్ ఎంట‌ర్ టైన‌ర్ గా రూపొందిస్తున్నారు. ఈ చిత్రంలో సుధీర్ బాబు- కృతి శెట్టి ప్రధాన పాత్రలు పోషిస్తున్నారు. వివేక్ సాగర్ సంగీతం అందిస్తుండ‌గా.. పి.జి.విందా సినిమాటోగ్రఫీ అందిస్తున్నారు. మార్తాండ్ కె వెంకటేష్ ఎడిటింగ్ చేస్తున్నారు. బెంచ్ మార్క్ స్టూడియోస్ బ్యానర్ పై మహేంద్రబాబు- కిరణ్ బళ్లపల్లి ఈ చిత్రాన్ని నిర్మిస్తున్నారు.

తాజాగా ఈ మూవీ టీజ‌ర్ విడుద‌లైంది. టీజ‌ర్ లో క‌ళ్ల డాక్ట‌ర్ తో ప్రేమ‌లో ప‌డే సినిమా డైరెక్ట‌ర్ గా సుధీర్ బాబు న‌ట‌న ఆక‌ట్టుకుంది. ఇక ఐ డాక్ట‌ర్ పాత్ర‌లో ఉప్పెన బ్యూటీ కృతి శెట్టి ఎంతో అందంగా ఒదిగిపోయి క‌నిపించింది. ఈ సినిమా ఆద్యంతం సుధీర్ బాబు - కృతి మ‌ధ్య అద్భుత‌మైన రొమాన్స్ నేప‌థ్యంలో తెర‌కెక్కింద‌ని అర్థ‌మ‌వుతోంది. ఇంద్ర‌గంటి ఈసారి త‌న స్క్రిప్ట్ లో స్క్రీన్ ప్లే ప‌ర‌మైన మ్యాజిక్ చేస్తున్నారా లేదా చూడాలి.

తాజాగా ఈ సినిమా నుంచి విడుద‌లైన కొత్త‌ స్టిల్ వైర‌ల్ గా మారింది. కృతి క‌ళ్ల‌లో కళ్లు పెట్టి చూస్తున్న సుధీర్ బాబు ఫోటోగ్రాఫ్ ఇంట‌ర్నెట్ ని షేక్ చేస్తోంది. బీచ్ ప‌రిస‌రాల్లో ప్రేమ జంట రొమాంటిక్ వ్య‌వ‌హారం ఎంతో బావుంది అంటూ ఈ ఫోటోగ్రాఫ్ పై ప్ర‌శంస‌లు కురుస్తున్నాయి. ఉప్పెన త‌ర్వాత వ‌రుస సినిమాల్లో న‌టిస్తున్న కృతికి ఈ సినిమా కూడా కీల‌కం కాగా.. వీ లాంటి ఫ్లాప్ త‌ర్వాత సుధీర్ బాబుకి మాంచి హిట్టు ప‌డాల్సిన అవ‌స‌రం ఉంది. శ్రీ‌దేవి సోడా సెంట‌ర్ తో ఫ‌ర్వాలేద‌నిపించాడు కాబ‌ట్టి ఇప్పుడు మ‌రో హిట్టుపైనా క‌న్నేశాడు.