సుజిత్ మాములుగా బుక్కవ్వలేదు

వసూళ్లు అన్ని కోట్లు ఇన్ని కోట్లు అని ఎంత చెప్పుకున్నా సాహో అధికశాతం జనామోదం పొందలేదన్నది వాస్తవం. 350 కోట్ల బడ్జెట్ తో తీసిన స్థాయిలో సినిమా లేదని పేరు గొప్ప ఊరు దిబ్బ అనే రేంజ్ లో దర్శకుడు సుజిత్ దీన్ని తెరకెక్కించాడని ఇప్పటికే ఫ్యాన్స్ ఫైర్ అవుతూనే ఉన్నారు. సోషల్ మీడియా గురించి అయితే చెప్పనక్కర్లేదు. ఇప్పటికీ తమ అక్కసును చెప్పుకుంటూనే ఉన్నారు. ముఖ్యంగా అందరూ సుజిత్ నే టార్గెట్ చేస్తున్నారు.

హీరోయిజం ఎలివేట్ అయ్యేలా కొన్ని సీన్లు కాపీ కొట్టినట్టు అనిపించే రెండు మూడు డైలాగులు రాసుకుంటే సరిపోదని ప్రేక్షకులను మెప్పించేలా కంటెంట్ ని ఎలా ప్రెజెంట్ చేయలన్న కామన్ సెన్స్ ఉండాలని ఇలా రకరకాల కామెంట్లతో విరుచుకుపడుతున్నారు. ఇది ఇంకొద్ది రోజులు సాగేలా ఉంది. కేవలం ఒక్క సినిమా అనుభవమే ఉన్నప్పటికీ నిర్మాతలు హీరో అంత పెద్ద బాద్యతను అప్పజెబితే స్క్రీన్ ప్లే బేస్డ్ అని చెప్పి ఇలా తీస్తారా అని నిలదీస్తున్నారు.

గాయం మీద కారం చల్లినట్టు సాహోని పదే పదే అజ్ఞాతవాసి కథతో రిజల్ట్ తో పోల్చడం ప్రభాస్ ఫ్యాన్స్ ని ఇంకా కలవరపెడుతోంది. కనీసం పవన్ సినిమా రిలీజైనప్పుడు చూసుకుని దానికి తగ్గట్టు కథలో ఏమైనా మార్పులు చేసుకున్నా బాగుండేదని అభిప్రాయ పడుతున్నారు. ఏదేమైనా నష్టం జరిగిపోయింది. దీన్నుంచి బయటపడి నెక్స్ట్ ఎలాంటి సినిమాతో సుజిత్ మెప్పిస్తాడని తేలడానికి కొంత టైం అయితే పడుతుంది కాని అప్పటిదాకా సాహోకు సంబంధించిన నిందలు మాత్రం భరించక తప్పదు