వివాదాల దాసుకు సుక్కు మాస్టారి ప్రశంసలు

ఈమధ్యే విడుదలైన 'ఫలక్ నుమా దాస్' పై నానా రచ్చా జరుగుతోందనే విషయం తెలిసిందే. ఈ సినిమాలో కొన్ని సీన్స్ బాగున్నాయి.. సహజత్వం ఉంది కానీ ఓవరాల్ గా సినిమాకు ఫెయిల్ మార్కులు వచ్చాయి. అటు ప్రేక్షకులు.. ఇటు రివ్యూయర్ల అభిప్రాయం దాదాపు ఒకే విధంగా ఉంది. అయితే ఈ సినిమా హీరో కం దర్శకుడు కం నిర్మాత ఆయిత విశ్వక్ సేన్ బోల్డ్ టాక్ పై అంతటా చర్చలు సాగుతున్నాయి. ఇదిలా ఉంటే స్టార్ డైరెక్టర్ సుకుమార్ ఈ సినిమాను చూసి తన అభిప్రాయాన్ని ఒక వీడియో ద్వారా పంచుకున్నారు.

ఈ సినిమాను సుకుమార్ ఆదివారం నాడు చూసిన తర్వాత "ఈ సినిమాను చూడడం ఒక మంచి ఎక్స్ పీరియన్స్. ఇంతవరకూ హైదరాబాద్ ను ఎవరూ అలా చూపించలేదు. నేను కూడా ట్రై చేశాను కానీ ఈ రేంజ్ లో కాదు. ఈ కల్చర్ కు ఒక ప్రత్యేకత ఉంది. ఈ సినిమాకు ఒక కొత్త కుర్రాడు దర్శకత్వం వహించాడు అంటే సర్ ప్రైజ్ అయ్యాను.. అది కూడా ఆర్టిస్ట్ గా చేస్తూనే దర్శకత్వం వహించడం చాలా కష్టమైన పని. పైగా సినిమాలో కొత్త ఆర్టిస్ట్ లకు అవకాశం ఇస్తూ ఇలా చేయడం మామూలు విషయం కాదు. సినిమాలో చిన్న పిల్లవాడి దగ్గర నుంచి ప్రతి ఒక్కరి డైలాగ్స్ చాలా ప్రొఫెషనల్ గా ఉన్నాయి. ప్రొఫెషనల్ అనే కంటే న్యాచురల్ గా ఉన్నాయని చెప్పడం కరెక్ట్. ఈ సినిమాకు సెన్సార్‌ వారు 'A' సర్టిఫికేట్‌ ఎందుకిచ్చారో నేను ఉహించలేను గానీ.. సినిమాలో నాకు ఎక్కడా అభ్యంతకర సన్నివేశాలు కనిపించలేదు" అంటూ ప్రశంసల వర్షం కురిపించాడు.

అసలే విశ్వక్ సేన్ బూతుల వివాదంపై ట్రోలింగ్.. ఆతర్వాత విశ్వక్ వివరణ ఇచ్చుకోవడం ఇలా జరుగుతూ సినిమాపై సర్వత్రా చర్చలు సాగుతున్నాయి. మీడియాలో బూతులు వాడుతూ మన కల్చర్ ను పాడు చేస్తున్నారని కొందరు విశ్వక్ పై విమర్శలు కూడా చేస్తున్నారు. ఇలాంటి సమయంలో సుకుమార్ లాంటి స్టార్ డైరెక్టర్ నుంచి ప్రశంసలు దక్కడం గొప్ప విషయమే.