ఉప్పెన‌ క్లైమాక్స్ మార్చేసిన సుకుమార్‌.. ద‌ర్శ‌కుడు ఫీలింగ్ ఏమంటే..?

ప్ర‌స్తుతం టాలీవుడ్‌లో ఉన్న మోస్ట్ టాలెంటెడ్ దర్శకుల లిస్టు ఔట్ చేస్తే.. అందులో సుకుమార్ పేరు ఖ‌చ్చితంగా ఉంటుంది. ఎందుకంటే.. త‌న‌ సినిమా ప‌ర్ఫెక్ష‌న్ కోసం సుక్కూ ప‌డే తాపత్రయం అలా ఉంటుంది. విభిన్న‌మైన ఆలోచ‌న‌ల‌తోపాటు.. సినిమా అద్భుతంగా తెర‌కెక్క‌డానికి ఎంతో ఆరాట‌ప‌డ‌తారు సుకుమార్‌.

ప్రస్తుతం సుకుమార్ స్టైలిష్ స్టార్ అల్లుఅర్జున్ హీరోగా 'పుష్ప' సినిమాను తెరకెక్కిస్తున్న విషయం తెలిసిందే. పాన్ ఇండియా స్థాయిలో రూపొందిస్తున్న ఈ మూవీని ఎంతో ప్రతిష్టాత్మకంగా చిత్రీకరిస్తున్నారు సుక్కూ. కాగా.. ఆయన శిష్యుడు బుచ్చిబాబు దర్శకుడిగా పరిచయం అవుతున్న మూవీ 'ఉప్పెన'. శిష్యుడికి మంచి ఆరంభం ఇచ్చేందుకు సుకుమార్ తనవంతుగా ప్రయత్నిస్తున్నారు.

ఉప్పెన సినిమా కథతోపాటు స్క్రీన్ ప్లే, డైలాగ్స్ అన్నీ బుచ్చిబాబే చూసుకున్నప్పటికీ.. క్లైమాక్స్ లో మాత్రం సుకుమార్ హెల్ప్ చేశాడట. బుచ్చిబాబు ఉప్పెన సినిమాకి చాలా షాకింగ్ క్లైమాక్స్‌ను సిద్ధం చేస్తే.. దాన్ని సుకుమార్ మార్పించి, ఎమోషనల్ క్లైమాక్స్ ను రాయించారట! ఈ విషయాన్ని స్వ‌యంగా బుచ్చిబాబు వెల్ల‌డించారు.

కాగా.. మార్చిన క్లైమాక్స్ ఎంతో అద్భుతంగా ఉందని చెప్పుకొచ్చాడు బుచ్చిబాబు. 'నేను సినిమా లైన్ చెప్పినప్పుడు సుకుమార్ గారు చాలా ఇంప్రెస్ అయ్యారు. సినిమా స్క్రిప్ట్‌ను మొత్తం పూర్తి చేయమని చెప్పారు. ఆ తరువాత నేను కథ మొత్తం సిద్ధం చేసి, వినిపించ‌డంతో వెంటనే నన్ను కౌగిలించుకున్నారు' అని చెప్పారు బుచ్చిబాబు.

మెగా మేన‌ల్లుడు వైష్ణ‌వ్ తేజ్ ఈ సినిమా ద్వారా హీరోగా ప‌రిచ‌యం అవుతున్న విష‌యం తెలిసిందే. సుకుమార్‌ రైటింగ్స్, మైత్రి మూవీ మేకర్స్‌ పతాకాలపై నవీన్‌ ఎర్నేని, వై.రవిశంకర్‌ నిర్మించారు. దేవీశ్రీ ప్ర‌సాద్ సంగీతం అందించారు. ఈ సినిమా ఈ నెల 12న ప్రేక్షకుల ముందుకు రాబోతోంది.