చరణ్ ను మోసం చేశానంటున్న సుకుమార్

ఓ టాప్ డైరెక్టర్.. స్టార్ హీరోను మోసం చేయడం అంటే అది చాలా పెద్ద విషయమే. అయితే.. ఉద్దేశ్యపూర్వకంగా చేయడం వేరు.. ఏదైనా ఒక ఆలోచన గురించి తెలుసుకోవడానికి చేయాల్సి రావడం వేరు. తాను ఇలాగే రామ్ చరణ్ ను మోసం చేశానని అంటున్నాడు ఇంటెలిజెంట్ డైరెక్టర్ సుకుమార్. రంగస్థలం విషయంలో రామ్ చరణ్ పెర్ఫామెన్స్ కు విపరీతమైన ప్రశంసలు దక్కుతున్నాయంటే.. అందులో సుకుమార్ ప్రతిభ కూడా చాలానే ఉంటుంది.

అయితే.. ఈ సినిమా విషయంలో కొన్ని అంశాలపై తాను పూర్తిగా నమ్మకం పెట్టలేకపోయానని చెబుతున్నాడు సుకుమార్. ముఖ్యంగా హీరోకి చెవిటి మిషన్ పెట్టే విషయంపై తుది నిర్ణయం తీసుకోలేకపోయాడట. ఎలా ఉంటుందన్న ఆలోచన మనసులో తిరుగుతుండగానే.. ఇలా మిషన్ పెట్టుకోవాల్సి ఉంటుంది అని మెగా పవర్ స్టార్ తో చెప్పాడట సుక్కు. ఇలా దర్శకుడు చెప్పడం ఆలస్యం.. మరేం మాట్లాడకుండా అదే పని చేసేశాడట చెర్రీ.

తనపై అంతగా నమ్మకం ఉంచి చరణ్.. తను అడిగిన వెంటనే చేసినా.. అది ఎలా ఉంటుంది.. ఎలా క్లిక్ అవుతుంది.. జనాలను మెప్పించగలదా లేదా అనే విషయాలపై స్పష్టత తెచ్చుకోలేకపోయాడట సుకుమార్. ఒక విధంగా తాను పూర్తిగా నమ్మకుండానే ఆయా సీన్స్ ను పిక్చరైజ్ చేసి.. రామ్ చరణ్ ను మోసం చేశానని అంటున్నాడు సుక్కు.