'పుష్ప' మూవీలో విలన్స్ వీళ్లేనా..?

సుకుమార్‌ దర్శకత్వంలో అల్లు అర్జున్‌ హీరోగా నటిస్తున్న లేటెస్ట్ మూవీ ''పుష్ప''. తెలుగు తమిళ మలయాళ కన్నడ హిందీ భాషల్లో రూపొందనున్న ఈ చిత్రాన్ని మైత్రీ మూవీ మేకర్స్ మరియు ముత్యంశెట్టి మీడియా బ్యానర్స్ కలిసి సంయుక్తంగా నిర్మిస్తున్నాయి. ఇందులో రష్మిక మందన్నా బన్నీ కి జోడీగా నటిస్తోంది. అల్లు అర్జున్ లారీ డ్రైవర్ గా.. కెరీర్ లో ఎన్నడూ కనిపించని విధంగా కొత్త గెటప్ లో 'పుష్ప' లో కనిపించనున్నాడు. పాన్ ఇండియా లెవల్లో రూపొందనున్న ఈ చిత్రంలో ఇతర నటీనటుల గురించి రోజుకో వార్త వస్తూనే ఉంది. ఇండస్ట్రీ వర్గాల సమాచారం ప్రకారం సుక్కు టీమ్ ఇప్పటికే విలన్ రోల్ కోసం కొందరిని ఫైనలైజ్ చేశారని తెలుస్తోంది.

సీనియర్ కమెడియన్ సునీల్ ని ఇందులో ఓ నెగెటివ్ షేడ్స్ ఉన్న పాత్ర కోసం తీసుకున్నారట. 'డిస్కోరాజా' 'కలర్ ఫోటో' చిత్రాల్లో విలన్ వేషాలు వేసిన సునీల్.. ఇప్పుడు 'పుష్ప' లో క్యారెక్టర్ నచ్చడంతో ఓకే చేసాడట. అలానే రావు రమేష్ - ముఖేష్ రుషి లను కూడా విలన్స్ గా తీసుకున్నారట. అలానే మెయిన్ విలన్ ని కూడా ఎంపిక చేసే పనిలో సుకుమార్ బిజీగా ఉన్నారట. త్వరలోనే ప్రధాన నటీనటులను 'పుష్ప' టీమ్ అధికారికంగా ప్రకటిస్తారని తెలుస్తోంది. కరోనా లాక్ డౌన్ కారణంగా గత కొన్ని నెలలుగా నిలిచిపోయిన షూటింగ్ ఇటీవలే తిరిగి ప్రారంభించారు. ఆంధ్రప్రదేశ్‌ లోని తూర్పుగోదావరి జిల్లా మన్యం ప్రాంతం మారేడుమిల్లి అభయారణ్యంలో ఈ మూవీ షూటింగ్ శరవేగంగా జరుగుతుంది.