సీనియర్ ఆర్టిస్టుల్ని అందుకే తీసుకోను-సుక్కు

క్రియేటివ్ డైరెక్టర్ సుకుమార్ సినిమాల్ని పరిశీలిస్తే అందులో సీనియర్ ఆర్టిస్టులు తక్కువగా ఉండటం గమనించవచ్చు. ఐతే తాను ఉద్దశపూర్వకంగానే సీనియర్ ఆర్టిస్టులతో పని చేయనని చెప్పాడు సుక్కు. ఇందుకు ఓ కారణం ఉందన్నాడు. ‘మనఊరి రామాయణం’ ఆడియో వేడుకలో సుక్కు ఆ కారణమేంటో వెల్లడించాడు.

‘‘నా సినిమాల్లో సీనియర్ ఆర్టిస్టులు పెద్దగా కనిపించరు. నాకు వాళ్లతో పని చేయడానికి ఉన్న భయమే అందుకు కారణం. ఒక దర్శకుడు ఒక టైంలో ఒక సినిమానే చేస్తాడు. కానీ నటులు అలా కాదు. చాలా సినిమాలు చేస్తారు. సీనియర్ ఆర్టిస్టులు చాలా సినిమాలు చేసి వస్తారు. వాళ్లు ఎన్నో విషయాలు తెలుసుకుని ఉంటారు. చాలామంది పెద్ద దర్శకుల్ని చూసి ఉంటారు. అలాంటి వాళ్ల ముందు ఓ షాట్ పెట్టాలంటే నాకు కంగారు పుడుతుంది. ఇదేంటి ఇలా చేశావు అంటారేమో అని భయం నాకు. అందుకే ఎందుకొచ్చిన తలనొప్పి అని సీనియర్ ఆర్టిస్టుల్ని తీసుకోను’’ అని సుకుమార్ చెప్పాడు.

ప్రకాష్ రాజ్ నటుడిగా ఎన్నో సినిమాలు చేశాడని.. ఎన్నో గొప్ప పాత్రలు చేశాడని.. ఎందరో దర్శకులతో పని చేశాడని.. దర్శకుడిగా వాళ్లందరిని శైలిని మిక్స్ చేసి సినిమా తీసి ఉండొచ్చని.. అలాగే వాళ్లందరికీ భిన్నంగా ఓ కొత్త శైలిలోనూ సినిమా తీసి ఉండొచ్చని సుకుమార్ అన్నాడు. ఓ దర్శకుడికి ఎంత కష్టం ఉంటుందో తనకు తెలుసని.. అందుకే తాను ఏ సినిమా చూసినా బాగా లేదని అననని.. ప్రకాష్ రాజ్ కష్టపడి తీసిన ‘మన ఊరి రామాయణం’ సూపర్ హిట్ కావాలని కోరుకుంటున్నానని సుకుమార్ ముగించాడు.