తన ప్రోగ్రామ్ కోసం తనే పాట పాడుకుంది

మామూలుగా ఈ మధ్యన చాలామంది స్టార్ హీరోలూ హీరోయిన్లు సింగర్లు అయిపోతున్నారు. వీరిలో చిన్నప్పటి నుండీ సంగీతంలో తర్ఫీదు పొందిన శృతి హాసన్‌ వంటి రమ్యమైన సింగర్లుంటే.. మరోవైపు పాడటం వచ్చేయడంతో ఏకంగా ఆల్బమ్ లు చేసేసిన ప్రియాంక చోప్రా వంటి భామలు కూడా ఉన్నారు. ఇక తెలుగులో కూడా ఈ లిస్టు పెద్దదే ఉందిలే.

అయితే మొన్ననే 'నాయకి' అనే సినిమా కోసం ఏకంగా హీరోయిన్‌ త్రిషతో పాట పాడించేసిన సింగర్ కమ్ మ్యూజిక్ డైరక్టర్ రఘు కుంచె.. ఇప్పుడు ''సెల్ మీ ది ఆన్సర్ '' అనే గేమ్ షో కోసం.. యాంకర్ సుమతో కూడా పాడించేశాడట. త్వరలో మా టివి లో రానున్న ఈ వినూత్న గేమ్‌ షో వ్యాఖ్యాత కూడా సుమే. అయితే ఈ ప్రోగ్రామ్ తాలూకు స్టార్టింగ్ టైటిల్స్ సాంగ్‌ ను ఎవరితో పాడించాలా అని చాలా ఆలోచించాక.. వట్టినే సుమతో ఒక ట్రాక్ సాంగ్ పాడించారట. చివరకు వినీ వినీ ఆమె వాయిస్ బాగుందని అనిపించడంతో.. అదే వాయిస్ తో మాష్టర్ వర్షన్ కూడా రికార్డు చేసినట్లు తెలుస్తోంది.

ఇప్పటికే చాలా ఖరీదైన యాంకర్ గా ఏకంగా ఒక పూటి ఆడియో ఫంక్షన్ కు లక్షకు పైగా ఛార్జ్ చేస్తుందట సుమ. ఇప్పుడు సింగర్ గా కూడా క్లిక్‌ అయితే.. అప్పుడు రేట్లు ఎలా పెంచేస్తుందో ఏంటో. ఏదేమైనా కూడా సుమ టాలెంటే వేరు గురూ!!