సుమంత్ సినిమా కూడా హాలీవుడ్ ప్రేరణేనా..?

ఈ తరం ప్రేక్షకుల దగ్గర .. ఇప్పటి దర్శకులు కాస్తంత ఒళ్లు దగ్గరపెట్టుకొని ఉండాల్సిన పరిస్థితులొచ్చాయి. కొత్త దర్శకుడు ఓ మంచి కథ చెప్పి హీరోల్ని పడగొట్టి. ఒప్పించినంత తేలిగ్గా.. ఆ సినిమాను సెట్స్ మీదకు తీసుకెళ్లి.. టీజర్ ,ట్రైలర్స్ తో రిలీజ్ కుముందే క్రేజ్ తెచ్చుకోవాలనుకోవడం కాస్తంత కష్టమైన పనిగా మారింది. ఎందుకంటే.. ఆ సినిమా ఏ హాలీవుడ్ మూవీకి ప్రేరణో ఆ సినిమా ఫస్ట్ లుక్ పోస్టర్స్ దగ్గరే పసిగట్టేస్తున్నారు. లేటెస్ట్ గా ‘దేవదాస్’ సినిమా హాలీవుడ్ మూవీ ఎనలైజ్ దిస్ అంటూ.. వాసన పసిగట్టేశారు జనం. అలాగే ఇప్పుడు మరో సినిమా కూడా హాలీవుడ్ మూవీ ఫ్రీమేక్ అని వార్తలొస్తున్నాయి. ఆ సినిమా మరేదో కాదు.. సుమంత్ హీరోగా తెరకెక్కిన ‘ఇదం జగత్’. ఈ సినిమా 2014 లో వచ్చిన హాలీవుడ్ మూవీ ‘నైట్ క్రాలర్’ సినిమా ప్రేరణ అంటున్నారు.

జేక్ గిల్లన్ హాల్ హీరోగా నటించిన ఈ సినిమా కథ అన్ ఎథికల్ జర్నలిజం బేస్డ్ గా సాగుతుంది. ఇందులో హీరో ఒక స్ట్రింగర్.. ఇతడి ప్రత్యేకత ఏంటంటే.. నగరంలో అర్ధరాత్రి జరిగే సంఘ వ్యతిరేక కార్యకలాపాల్ని.. దొంగచాటుగా షూట్ చేసి ఆ ఫుటేజ్ ను ఒక లోకల్ ఛానల్ కు అమ్ముకొని సొమ్ముచేసుకుంటూంటాడు. ఈ క్రమంలో జరిగే అనూహ్య సంఘటనల్ని హీరో ఎలా ఫేస్ చేశాడన్నదే మిగతా కథ. డ్యాన్ గిలోరీ డైరెక్షన్ లో తెరకెక్కిన ఈ సినిమా అప్పట్లో మంచి విజయం సాధించింది. ‘ఇదం జగత్’ మూవీ టీజర్ ను బట్టి అందులోని సన్నివేశాల్ని బట్టి ఇది ఆ సినిమాకి ఫ్రీమేకే అని కన్ఫర్మ్ చేసేశారు జనం. .. మరి ఇది ఆ సినిమానో కాదో తెలియాలంటే. కొద్దిరోజులు ఆగాల్సిందే.