నేనూ మహానుభావుడినే

మహానుభావుడు మూవీతో హీరో శర్వానంద్ ఖాతాలో మరో హిట్ పడింది. అబ్సెసివ్ కంపల్సివ్ డిజార్డర్ (ఓసీడీ) అనే వ్యాధి కారణంగా అతి శుభ్రత పాటిస్తూ అందుకోసం ఆరాటపడే వ్యక్తి పాత్రలో శర్వానంద్ నటన అందరినీ ఆకట్టుకుంది. మారుతి దర్శకత్వంలో వచ్చిన ఈ సినిమాకు డబ్బులతో పాటు ప్రశంసలూ బాగానే వస్తున్నాయి.

తాజాగా ఈ మూవీ చూసిన నటుడు సుమంత్ తనకు తెగ నచ్చేసింది అంటున్నాడు. అందుకు కారణం తనకు కూడా ఓసీడీ ఉండటమేనట. మరీ మహానుభావుడు అంత కాకపోయినా తనకూ కాస్త ఉందని అంటున్నాడు. సినిమా చూశాక సోషల్ మీడియా ద్వారా యూనిట్ కు తన అభినందనలు తెలిపారు. ‘‘మహానుభావుడు సినిమాను బాగా ఎంజాయ్ చేయగలిగా. నాకు కూడా ఓసీడీ ఉందని అనిపించడంతో ఈ సినిమా ఇంకా బాగా నచ్చింది. హీరో శర్వానంద్ - డైరెక్టర్ - మారుతి - యూవీ క్రియేషన్స్ బ్యానర్ అండ్ టీంకు నా అభినందనలు ’’ అంటూ ట్వీట్ చేశాడు.

ఈ మధ్య లోబడ్జెట్ సినిమాలతో బాక్సాఫీస్ వద్ద హిట్ కొట్టేందుకు సుమంత్ ప్రయత్నాలు చేస్తున్నాడు. హిందీలో హిట్టయిన విక్కీ డోనర్ ఆధారంగా ‘నరుడా.. డోనరుడా’ సినిమా తీసినా అది ప్రేక్షకులను ఆకట్టుకోలేకపోయింది. దీంతో తాజాగా గౌతం తిన్ననూరి డైరెక్షన్ లో మళ్లీ రావా సినిమా చేస్తున్నాడు. దీంతో అయినా బౌన్స్ బ్యాక్ అవుతాడేమో చూడాలి.