ఆ రెండూ నన్ను గట్టిగానే కొట్టాయ్

సహజంగా సినిమా ఫ్లాప్ అయినా.. చాలామంది హీరోలు హిట్టు అని ఊదరగొడుతుంటారు. స్టార్స్ అయితే దాని గురించి పెదవి కూడా విప్పరు. కానీ సందీప్ కిషన్ మాత్రం.. తనకు ఎదురైన ఫ్లాప్స్ గురించి మాట్లాడ్డమే కాదు.. షాకింగ్ కామెంట్స్ కూడా చేశాడు.

ప్రస్తుతం నగరం మూవీని థియేటర్లలోకి తెస్తున్న ఈ కుర్ర హీరో.. పలు ఇంటర్వ్యూలు ఇచ్చాడు. వీటిలో భాగంగా గత ఫ్లాపుల గురించి కూడా మాట్లాడాడు. 'ఒక అమ్మాయి తప్ప.. రన్ చిత్రాలు నాకు పెద్ద దెబ్బలే కొట్టాయి. ఒక పరిస్థితిలో నా సినిమాల ఎంపిక సామర్ధ్యాన్ని ప్రశ్నించుకున్నాను. మరింత ధృడంగా మారి.. ప్రేక్షకులకు ఏం కావాలో అర్ధం చేసుకున్నాను. ఆడియన్స్ ఇచ్చిన బాధ్యతను నెరవేర్చాలని భావించాను. ఎంతో కష్టపడి చేసిన నగరం మూవీకి.. ఇప్పుడు వస్తున్న రెస్పాన్స్ నాకు పెద్ద రిలీఫ్' అంటున్నాడు సందీప్ కిషన్.

రెజీనా కసాండ్రాతో ఎక్కువగా జత కడుతున్న విషయం గమనించానన్న సందీప్.. డైరెక్టర్ ఎంపిక తప్ప తాను చేయగలిగింది ఏం లేదని చెప్పాడు. అసలు ఈ చిత్రాన్ని సడెన్ గా రిలీజ్ చేయడం వెనక.. నిర్మాత ఎస్ఆర్ ప్రభు ప్లానింగ్ ఉందంటూ కొత్త విషయం చెప్పాడు సందీప్. ఈ మూవీలో బోలెడంత కంటెంట్ ఉందని.. అందుకే ఎక్కువ ప్రచార ఆర్భాటం చేయడం లేదంటున్నాడు.

ఇక రాబోయే సినిమాల విషయానికి వస్తే నక్షత్రం మూవీ కోసం మరో వారం రోజుల షూటింగ్ మాత్రమే పెండింగ్ ఉందని చెప్పిన సందీప్ కిషన్.. తమిళ్ లో తెరకెక్కుతన్న మాయావన్ చిత్రాన్ని తెలుగులో మాయావి పేరుతో డబ్బింగ్ వెర్షన్ రిలీజ్ చేయనున్నట్లు తెలిపాడు.