తెలంగాణ యాస రాదని తీసేశారట

హిట్లు ఫ్లాపులతో సంబంధం లేకుండా యువ కథానాయకుడు సందీప్ కిషన్ టాలీవుడ్లో చాలా అవకాశాలే అందుకున్నాడు. 20కి పైగా సినిమాలు చేశాడు. కొన్నేళ్ల కిందటి వరకు అతడి పరిస్థితి బాగానే ఉంది కానీ.. ఈ మధ్య వరుసగా ఎదురు దెబ్బలు తగిలి కథానాయకుడిగా బాగా వెనుకబడిపోయాడు సందీప్. ఐతే తన కెరీర్లో రెండు మంచి అవకాశాలు మిస్సయిపోయానని.. అవి చేసి ఉంటే తన కెరీర్ మరోలా ఉండేదని అంటున్నాడు సందీప్. ఆ సినిమాలు మరేవో కావు.. హ్యాపీడేస్.. అష్టాచెమ్మా.

ఈ రెండు సినిమాలకూ సందీప్ ఆడిషన్స్‌ కు వెళ్లాడట. తన టాలెంట్ కూడా చూపించాడట. కానీ అనివార్య కారణాల వల్ల తాను ఆ సినిమాలు చేయలేకపోయానని అతను చెప్పాడు. ‘హ్యాపీడేస్’ సినిమాలో నాలుగు పాత్రలకూ సందీప్ ను ట్రై చేసి చూశారట. చివరికి నిఖిల్ చేసిన రాజేష్ పాత్రకు సందీప్ ఓకే అయ్యాడట. కానీ ఆ పాత్రకు తెలంగాణ యాసలో డైలాగులు చెప్పాల్సి ఉండటంతో ఇబ్బంది వచ్చిందట. సందీప్ కు ఆ స్లాంగ్ రాకపోవడంతో అతడిని తప్పించాడట కమ్ముల. ఈ విషయంలో సందీప్ కు సారీ కూడా చెప్పాడట. ఇక ‘అష్టాచెమ్మా’ విషయానికి వస్తే.. ఇంద్రగంటికి సందీప్ టాలెంట్ నచ్చినప్పటికీ అతడికి తగ్గ పాత్ర లేకపోవడంతో ఈ సినిమాకు తీసుకోలేదట. హీరో పాత్రకు సందీప్ సూటయ్యేట్లు ఉన్నప్పటికీ అప్పటికే నానిని సెలక్ట్ చేసి ఉండటంతో కుదర్లేదట. ఇక అవసరాల శ్రీనివాస్ పాత్రకు నువ్వు సూటవ్వవు అంటూ సందీప్ కు నో చెప్పాడట ఇంద్రగంటి. అలా ఆ రెండు సినిమాలూ తాను మిస్సయినట్లు అతను తాజాగా ఒక ఇంటర్వ్యూలో చెప్పాడు.