అప్పుడు ఫ్రెండయ్యాడు..ఇప్పుడు సినిమా చేస్తున్నాడు

‘ఒక్క అమ్మాయి తప్ప’ మీద బోలెడన్ని ఆశలు పెట్టుకున్నాడు యువ కథానాయకుడు సందీప్ కిషన్. కానీ ఆ సినిమా నిరాశ పరిచింది. ఇక దాని గురించి ఎక్కువ ఆలోచించకుండా వెంటనే తన తర్వాతి సినిమా మీదికి ఫోకస్ షిఫ్ట్ చేశాడు సందీప్. సీనియర్ డైరెక్టర్ కృష్ణవంశీ దర్శకత్వంలో సందీప్ ‘నక్షత్రం’ అనే సినిమా చేస్తున్న సంగతి తెలిసిందే. కొన్ని నెలల కిందటే ప్రారంభోత్సవం జరుపుకున్న ఈ చిత్రం ఈ రోజే సెట్స్ మీదికి వెళ్లింది.

‘నక్షత్రం’ రెగ్యులర్ షూటింగ్ మొదలైన సందర్భంగా సందీప్ పాత జ్నాపకాల్లోకి వెళ్లిపోయాడు. 2009లో అతను ఫేస్ బుక్ లో కృష్ణవంశీకి ఫ్రెండ్స్ రిక్వెస్ట్ పంపాడట. ఆ రోజు ఆయన తన రిక్వెస్ట్ ఆమోదించాక చాలా సంతోషిస్తూ.. తాను ఆయనకు బిగ్ ఫ్యాన్ అని.. ఎప్పట్నుంచో కలవాలని ప్రయత్నిస్తాని.. త్వరలోనే తన ఆశ తీరుతుందని చెబుతూ రిప్లై మెసేజ్ పెట్టాడట. ఫ్రెండ్స్ రిక్వెస్ట్ ఆమోదిస్తేనే అంత సంతోషించిన తాను.. ఇప్పుడు అదే దర్శకుడితో సినిమా చేస్తున్నానంటూ పొంగిపోయాడు సందీప్. ఒకప్పుడు తనకు.. కృష్టవంశీకి మధ్య జరిగిన ఫేస్ బుక్ సంభాషణ తాలూకు పిక్ కూడా షేర్ చేశాడు సందీప్.

‘గోవిందుడు అందరివాడేలే’ తర్వాత బాగా గ్యాప్ తీసుకుని కృష్ణవంశీ చేస్తున్న సినిమా ఇది. జెమిని కిరణ్ నిర్మించే ఈ చిత్రంలో ఓ కొత్తమ్మాయి హీరోయిన్ గా నటిస్తుందంటున్నారు. ప్రకాష్ రాజ్.. సుదీప్ కీలక పాత్రలు పోషిస్తారని కూడా ప్రచారం జరుగుతోంది. ఇందులో సందీప్ కానిస్టేబుల్ పాత్ర పోషిస్తాడని సమాచారం.