సందీప్ సినిమాకు అక్కడ భలే క్రేజ్

‘వెంకటాద్రి ఎక్స్ ప్రెస్’ సినిమాతో సందీప్ కిషన్ కు తెలుగులో మంచి క్రేజే వచ్చింది. అవకాశాలు కూడా బాగానే వచ్చిపడ్డాయి. కానీ వాటిని సద్వినియోగం చేసుకోలేకపోయాడు సందీప్. వరుస ఫ్లాపులతో ఇక్కడ బాగా వెనుకబడిపోయాడు. గత ఏడాది రన్.. ఒక్క అమ్మాయి తప్ప అతడికి తీవ్ర నిరాశను మిగిల్చాయి. ఐతే ఈ సినిమాలు సెట్స్ మీద ఉండగానే.. తమిళంలో రెండు ఇంట్రెస్టింగ్ ప్రాజెక్టులు లైన్లో పెట్టాడు సందీప్. అవే.. మానగరం.. మాయవన్. ఇవి రెండూ కూడా థ్రిల్లర్ సినిమాలే. ఇందులో ‘మానగరం’ విడుదలకు సిద్ధమైపోయింది. ఈ నెల పదో తారీఖున తమిళం.. తెలుగు భాషలు రెండింట్లోనూ ఈ చిత్రం ఒకేసారి విడుదల కానుంది.

‘మానగరం’ విషయంలో చాలా కాన్ఫిడెంటుగా ఉన్న చిత్ర బృందం కొందరు సినీ ప్రముఖులకు.. మీడియా వాళ్లకు ముందుగానే ప్రివ్యూ షోలు వేస్తోంది. ఆల్రెడీ సినిమా చూసిన వాళ్లు సోషల్ మీడియాలో ఈ సినిమా గురించి గొప్పగా చెబుతున్నారు. దీంతో సినిమాకు అక్కడ మంచి క్రేజ్ వచ్చేసింది. సినిమాను కొంచెం పెద్ద స్థాయిలోనే రిలీజ్ చేస్తున్నారు. లోకేష్ కనగరాజ్ అనే కొత్త దర్శకుడు రూపొందించిన ఈ చిత్రంలో సందీప్ తో పాటు శ్రీ.. రెజీనా కీలక పాత్రలు పోషించారు. ఇదొక అర్బన్ క్రైమ్ థ్రిల్లర్. తెలుగులో ‘నగరం’ పేరుతో రిలీజ్ చేస్తున్నారు. తాజాగా తెలుగు ట్రైలర్ కూడా రిలీజ్ చేశారు. అది సినిమాపై ఆసక్తి రేకెత్తించేలా ఉంది. తెలుగు వెర్షన్ విషయంలో ఇంతకుముందు ఏం పట్టనట్లు ఉన్నారు కానీ.. ఇప్పుడు కొంచెం గట్టిగానే ప్రమోట్ చేస్తున్నారు. ఈ వారం చాలా సినిమాలు రిలీజవుతున్నాయి కానీ.. వాటన్నింట్లోకి జనాల్ని ఎక్కువ ఆకర్షించే సినిమా ‘నగరం’ అనే చెప్పాలి. మరి ఈ సినిమాకు రెండు భాషల్లో ఎలాంటి ఫలితం వస్తుందో చూడాలి.

Like Us on Facebook : https://www.facebook.com/Tupakidotcom/