ఆ చిన్నోడితో సందీప్ కిషన్

టాలీవుడ్ యువ సినిమాటోగ్రాఫర్ కార్తీక్ ఘట్టమనేని చూడ్డానికి టేనేజ్ కుర్రాడిలా కనిపిస్తాడు. కానీ ఛాయాగ్రాహకుడిగా అతడి పనితనం ఏంటన్నది ‘కార్తికేయ’.. ‘ఎక్స్‌ప్రెస్ రాజా’.. ‘ప్రేమమ్’.. ‘నిన్ను కోరి’ లాంటి సినిమాలు చూసి చెప్పేయొచ్చు. ఓవైపు ఛాయాగ్రాహకుడిగా కొనసాగుతూనే ఈ కుర్రాడు దర్శకుడిగానూ అరంగేట్రం చేశాడు. అతను మెగా ఫోన్ పట్టి తీసిన ‘సూర్య వెర్సస్ సూర్య పర్వాలేదనిపించింది. ఈ సినిమా కాన్సెప్ట్ విమర్శకుల ప్రశంసలందుకుంది. ఆ సినిమా తర్వాత మళ్లీ కెమెరామన్‌ గానే కొనసాగాడు కార్తీక్. ఐతే ఇప్పుడతను దర్శకుడిగా తన రెండో సినిమాకు రెడీ అయిపోయాడు.

యువ కథానాయకుడు సందీప్ కిషన్ హీరోగా కార్తీక్ తన రెండో సినిమా తీయబోతున్నాడు. ఈ విషయాన్ని సందీపే స్వయంగా వెల్లడించాడు. శనివారం కార్తీక్ పుట్టినరోజు సందర్భంగా సందీప్ అతడికి పుట్టిన రోజు శుభాకాంక్షలు చెబుతూ.. తాను కార్తీక్ దర్శకత్వంలో నటించబోతున్నట్లు వెల్లడించాడు. సందీప్ త్వరలోనే ‘కేరాఫ్ సూర్య’ సినిమాతో ప్రేక్షకుల ముందుకు రానున్నాడు. తమిళంలో అతను హీరోగా నటించిన ‘మాయవన్’ అనే సినిమా కూడా రాబోతోంది. ‘16’ దర్శకుడు కార్తీక్ నరేన్ దర్శకత్వంలో ‘నరకాసురన్’ (తెలుగులో నరకాసురుడు) అనే సినిమాలోనూ నటిస్తున్న సందీప్.. గౌతమ్ మీనన్ దర్శకత్వంలోనూ ఓ సినిమా చేయాల్సి ఉంది.