ఆ హీరోకి రెమ్యూనరేషన్ ఇస్తారా ఇవ్వరా?

‘ఒక్క అమ్మాయి తప్ప’ సినిమా కోసం పెద్ద త్యాగమే చేశాడు సందీప్ కిషన్. ఈ సినిమాకు అతను పారితోషకమే తీసుకోలేదు. నాలుగేళ్ల ముందే ఈ కథ విన్న సందీప్.. రెండుసార్లు మొదలైనట్లే మొదలై ఆగిపోయిన ఈ ప్రాజెక్టుపై ఆశలు వదులుకోకుండా దర్శకుడితో పాటు తన వంతుగా ప్రయత్నాలు చేశాడు. చివరికి బోగాది అంజిరెడ్డి అనే నిర్మాతను పట్టుకుని సినిమాను పట్టాలెక్కించాడు. బడ్జెట్ సమస్యలుండటంతో తనకు ముందే రెమ్యూనరేషన్ ఇవ్వాల్సిన పని లేదని.. సినిమా విడుదలై హిట్టయ్యాక పారితోషకం తీసుకునేలా అనధికారిక ఒప్పందం చేసుకున్నాడు. ఐతే సందీప్ ఈ సినిమా గురించి ఎంతో చెప్పాడు కానీ.. తెర మీద చూస్తే అంత లేదని తేలిపోయింది.

సినిమాకు మిక్స్డ్ టాక్ వచ్చింది. కలెక్షన్లు మాత్రం పర్వాలేదన్నట్లే ఉన్నాయి. సినిమాకు నెగెటివ్ టాక్.. నెగెటివ్ రివ్యూలు వచ్చినా.. కలెక్షన్లు బాగున్నాయంటూ రెండో రోజు నుంచి ట్వీట్లు అవీ చేస్తున్నాడు సందీప్. నైజాం ఏరియాలో థియేటర్లు కూడా పెరిగినట్లు చెప్పాడతను. మల్టీప్లెక్సుల్లో ‘ఒక్క అమ్మాయి తప్ప’ స్క్రీన్ల దగ్గర జనాల హడావుడి ఉన్న ఫొటోల్ని కూడా షేర్ చేస్తున్నాడు. మొత్తానికి తన వంతుగా సినిమాను ప్రమోట్ చేయడానికి చాలానే కష్టపడుతున్నాడు. బహుశా నిర్మాతకు లాభాలు వస్తే తప్ప తనకు రావాల్సిన పారితోషకం రాదని ఇలా కష్టపడుతున్నాడేమో. తొలి రోజు ఈ సినిమా కోటి రూపాయలకు పైగానే కలెక్ట్ చేసింది. సందీప్ రేంజ్ ప్రకారం చూస్తే ఇది పెద్ద మొత్తమే. వీకెండ్ అంతా కూడా ఇలాగే వసూళ్లు రాబట్టి.. సోమవారం నుంచి పెద్ద డ్రాప్ లేకుండా చూసుకోగలిగితే ‘ఒక్క అమ్మాయి తప్ప’ బ్రేక్ ఈవెన్ స్థాయిని దాటి.. కొంత వరకు లాభాలు రాబట్టవచ్చు. సందీప్ కు పారితోషకం దక్కొచ్చు. మరి ఏం జరుగుతుందో చూడాలి.