సునీల్ అభిమానుల్లో సినిమా పేరు టెన్షన్..

సునీల్ హీరోగా నటిస్తున్న కృష్ణాష్టమి రిలీజ్ కి రెడీ అవుతోంది. గతంలో మనోడి లుక్ పై కాస్త విమర్శలు రావడంతో... ఇప్పుడు కొంచెం బొద్దుగా కనిపిస్తూ... పాత సునీల్ ని మరిపిస్తున్నాడు. ట్రైలర్ కూడా ప్రామిసింగ్ గానే ఉంది. అయితే.. సినిమా పేరు మాత్రం అభిమానుల్లో టెన్షన్ పుట్టిస్తోంది.

పండుగ పేరైన కృష్ణాష్టమి... క్యాచీగానే ఉన్నా.. ఇలా పండుగ పేర్లను సినిమాలకుపెట్టిన సందర్భాల్లో.. హిట్స్ కంటే ఫ్లాప్సే ఎక్కువగా ఉన్నాయి. ముఖ్యంగా టాలీవుడ్ లో ఈ సెంటిమెంట్ ఎక్కువగా ఉంది. కృష్ణ హీరోగా వటించిన భోగిమంటలు యావరేజ్ చిత్రం కాగా... వెంకటేష్ నటించిన సంక్రాంతి హిట్ అనిపించుకుంది. ఆ తర్వాత ఎస్వీ కృష్ణారెడ్డి నటించి దర్శకత్వం వహించిన ఉగాది అట్టర్ ఫ్లాప్ గా మిగిలింది. రాజేంద్రప్రసాద్ చేసిన మహాశివరాత్రి పెద్దగా కాసులు కురిపించలేకపోయింది.

ఉదయ్ కిరణ్ నటించిన హోలీ డిజాస్టర్ గా మిగిలింది. ఎన్టీఆర్ నటించిన వినాయక చవితి సూపర్ హిట్ గా నిలిచింది. కళ్యాణ్ రామ్ విజయ దశమి ఫ్లాపైంది. ఎన్టీఆర్ కాంతారావు కలిసి చేసిన దీపావళి హిట్ కాగా.. ఇదే పేరుతో వేణు చేస్తే జనాలు తిరస్కరించారు. కార్తీక పౌర్ణమి పేరుతో వచ్చిన సినిమా యావరేజ్ గా నిలిచింది. 50ఏళ్ల క్రితం వచ్చిన వరలక్ష్మీ వ్రతం హిట్ చిత్రం కాగా... ఇప్పుడు సునీల్ కృష్ణాష్టమి అంటూ సందడి చేయబోతున్నాడు. సినిమా సంగతేమో కానీ.. సెంటిమెంట్ మాత్రం అనుమానాలు రేకెత్తిస్తోంది.