సునీల్‌ కూడా ఎన్నారై.. ఇదో ఫ్యాషన్‌

సునీల్‌ హీరోగా వాసూవర్మ దర్శకత్వంలో దిల్‌ రాజు నిర్మిస్తున్న 'కృష్ణాష్టమి' ఫస్ట్‌ లుక్‌ రిలీజైంది. ఈ సినిమా చిత్రీకరణ దాదాపు పూర్తయింది. నిర్మాణానంతర పనుల్ని ప్రారంభించనున్నారు. నిన్ననే ఫస్ట్‌ లుక్‌ రిలీజ్‌ వేడుకలో దర్శకనిర్మాతలు చెప్పిన విషయాల్ని వింటే ఇదో రొటీన్‌ స్టోరీనే అని అర్థమవుతోంది. ఎప్పటిలానే అమెరికా నుంచి వచ్చే ఓ ఎన్నారైకి ఊళ్లో ఎలాంటి సమస్యలు ఎదురయ్యాయి? వాటిని ఎలా సాల్వ్‌ చేశాడు? అన్నదే సినిమా అట.

నిన్నగాక మొన్న రిలీజై హిట్‌ కొట్టిన శ్రీమంతుడు కాన్సెప్టు కూడా ఇంచుమించు ఇదే. ఓ బిలియనీర్‌ సొంతూరికి ఏదో చేయాలనుకుంటే ఎలాంటి అడ్డంకులొచ్చాయన్నదే సినిమా. ఇంతకుముందు ఇదే పాయింటుతో బోలెడన్ని సినిమాలొచ్చాయి. శంకర్‌ దర్శకత్వం వహించిన 'శివాజీ' కాన్సెప్టు కూడా ఇదే. ఊరిని బాగుచేయాలని వచ్చిన ఎన్నారైకి ఓ రాజకీయ నేత వల్ల ఎలాంటి పరిస్థితులు ఎదురయ్యాయన్నదే సినిమా. ఇలా చూస్తే ఎన్నో కథలు ఇలాంటివి వచ్చాయి. మరోసారి సునీల్‌ కూడా అలాంటి ఎటెంప్టే చేస్తున్నాడు. అన్ని ఎనారైల కథల్లానే సునీల్‌ కథ కూడా సక్సెసవుతుందేమో చూడాలి. కథ ఎన్నారై చుట్టూ తిరిగినా హీరోని బట్టి ఫ్లేవర్‌ మారిపోతుంది కాబట్టి అదొక్కటే సునీల్‌ ని కాపాడుతుందేమో!