ట్రైలర్‌ టాక్‌: సునీల్‌ కూడా సేమ్‌ అదే

ఇప్పటివరకు మనం చూసి చూసి అలసిపోయిన స్టోరీల్లో చాలా పాపులర్‌ కథ ఒకటుంది. దర్శకుడు తేజ ఈ మధ్యనే చాలాసార్లు చెప్పాడు ఆ విషయం. ఎక్కడో ఫారిన్‌ నుండి ఒక హీరో ఇండియాలోని తన వారింటికి వస్తాడు. రావడంతో వారిని మార్చేస్తాడు. విలన్ల ఆట కట్టించేస్తాడు. దట్సిట్‌. గ్రీకు వీరుడు - గోవిందుడు అందరివాడేలే - పండగచేస్కో.. అబ్బో లిస్టు పెద్దదే.

ఇప్పుడు ఇదే లిస్టులోకి నేనున్నానంటూ వచ్చేశాడు సునీల్‌. కృష్ణాష్టమి మనోడి తాజా చిత్రం. ఈ సినిమాలో ఇతగాడు ఎన్నారై. అయితే అమెరికాలో పుట్టిపెరిగిన వాడిలా పొరపాటున కూడా అనిపించడులే. ఎందుకంటే ఆ వాయిస్‌ స్లాంగ్‌ కి అమెరికన్‌ బార్న్‌ అంటే నమ్మడం కష్టం. అమెరికాలో ఒకమ్మాయిని పడేయటం.. అలాగే ఇండియాలో ఫ్యామిలీ.. ఇక్కడ ఇంకో హీరోయిన్‌. బీభత్సమైన కొత్త స్టోరీ అంటూ దిల్‌ రాజు అండ్‌ కో.. దర్శకుడు వాసు వర్మ తీసిన ఈ కృష్ణాష్టమి ట్రైలర్‌ రొటీన్‌ గానే ఉన్నా కూడా.. సినిమాలో కామెడీ ఉంటే ఆడేస్తుందేమో.

ట్రైలర్‌ విషయంలో హైలైట్లు అంటే.. చోటా కె నాయుడు కెమెరా అనే చెప్పాలి. దినేష్‌ మ్యూజిక్‌ ఓకె. నిక్కి గల్రానీ బార్బీ బొమ్మలాగా.. డింపుల్‌ చొపాడే విలేజ్‌ పిల్లలా.. బాగానే ఉన్నారులే. ఫిబ్రవరి 5న సినిమా విడుదలవుతోంది.